Ecuria e procesit të reformave integruese – Nis tryeza e Dialogut Shqipëri-BE

Nisi të mërkurën në Hotel Sheraton tryeza e Dialogut të Nivelit të Lartë Shqipëri-BE, e cila bashkëdrejtohet nga kryeministri Edi Rama dhe Komisioneri për Zgjerimin, Johanes Hahn.

Tryeza, që po zhvillohet pa praninë e medias, do të diskutojë rreth ecurisë së Shqipërisë në procesin e reformave kyçe, të domosdoshme për çeljen e negociatave për anëtarësim në BE.

Konkluzionet e këtij takimi do të jepen pas mesdite nga kryeministri Rama dhe komisioneri Hahn, gjatë një konference të përbashkët për shtyp.

Dialogu i lartë Shqipëri-BE u inicua në vitin 2013 nga ish-komisioneri për Zgjerimin, Stefan Fule për të nxitur përparimin e Shqipërsë në procesin e integrimit europian.