Eklipsi diellor, në Tiranë shfaqet i pjesshëm

Eklipsi i plotë i Diellit, i vetmi për 2015-n, është parë pjesërisht të premten edhe në Tiranë, rreth orës 9:41.

Në vendin tonë, Dielli do të duket i mbuluar në masën 40-50% nga Hëna, ndërsa mëngjesi dhe mesdita e sotme, për më shumë se dy orë do të shndërrohen në pasdite. Eklipsi diellor, kjo dukuri astronomike që ndodh kur Hëna kalon mes Tokës dhe Diellit, do të përfundojë në orën 11:52. Për të gjithë të apasionuarit këshillohet që eklipsi të shihet me mjete mbrojtëse.

Rreth 2 000 turistë pritet të shkojnë në arkipelagun norvegjez Svalbard (Spitzberg), që ndodhet në Arktik rreth 2 000 kilometra në veri të Oslos, i vetmi territor me ishujt danez Faroe nga ku mund të vërehet ky fenomen, gjatë të cilit Dielli do të shndërrrohet në një disk të zi për dy minuta e 47 sekonda.

Ky eklips përkon edhe me ekuinoksin e pranverës. Ai do të fillojë në orën 09:41 në Faroe dhe në orën 10:11 në Svalbard. Fenomeni do të fillojë dy orë më herët në Kepin e Gjelbërt, por atëherë ai do të vërehet me vështirësi.