Eksperti ndërkombëtar këshillë Erjon Veliajt: Përshtatuni, mos Kopjoni

Këshilltari i disa kryetarëve të bashkie në botë, eksperti Gil Penalosa mbajti një konferencë në Tiranë për të përcjellë eksperiencat e tij për shtimin e hapësirave të gjelbra në kryeqytetin shqiptar.

Drejtues i Agjencisë së Parqeve në Bogota ka një këshillë:

“Ju mund të thoni se Tirana nuk ka gjë të ngjashme me Bogotanë dhe Nju Jorkun. E di që ju jeni unikë, kështu që dëgjoni çfarë po ju them unë: përqendrohuni te të tjerët, por mos kopjoni. E dimë që jeni unik, çdo rrugë e Tiranës është unike në vetvete, ndaj mos kopjoni, por përshtatuni që të mos bëni të njëjtat gabime që kanë bërë qytetet e tjera. Por, këtë duhet ta bëjmë shpejt, duhet të ecim shpejt në Tiranë”, tha Penalosa.

Ai  shprehu nevojën për krijimin dhe përdorimin e parqeve dhe rrugëve si ambiente sociale, si dhe lëvizshmërinë e qëndrueshme.

Kryetari i Bashkisë së Tiranës, Erion Veliaj, i cili mori pjesë në këtë takim, tha se filozofia e Penalosës për zhvillimin e qyteteve është ajo për të cilën ka nevojë edhe Tirana. Sipas Veliaj, qyteti e ka kaluar fazën e tij të emergjencës, ndaj tashmë duhen ndërhyrje që sjellin ndryshime afatgjatë në jetën e qytetarëve.

“Tani duhet të shkojmë në një nivel tjetër, si të konceptojmë jo më Tiranën e emergjencave të këtyre 10 muajve të fundit, por Tiranën e ëndrrave që duam të menaxhojmë në vitet në vazhdim. Miku që kemi ftuar sot ka qenë drejtues i Agjencisë së Parqeve në Bogota. Historitë e suksesit të Bogotasë, që cilësohet si një nga qytetet më të mirëmenaxhuara në të gjithë hemisferën perëndimore, besoj se do të na frymëzojnë edhe këtu në Tiranë, por mbi të gjitha secilën prej agjencive tona do ta fuqizojnë me ide konkrete se si mund të transformohet qyteti”, tha Veliaj.