Ekspozitë muzeale në 130-vjetorin e shpalljes së Zojës së Këshillit të Mirë “Pajtore e Shqipërisë”

Në Shkodër u hap një ekspozitë muzeale me karakter historik dhe shpirtëror, për të shënuar 130-vjetorin e shpalljes së Zojës së Këshillit të Mirë “Pajtore e Shqipërisë”.

Ceremonia solemne e hapjes u zhvillua në ambientet e Bazilikës së Nënës së Këshillit të Mirë, me pjesëmarrjen e Kardinalit Roland Makrickas, përfaqësuesve nga Bazilika Papnore e Santa Maria Maggiore, si dhe autoriteteve fetare dhe civile.

Kardinali Roland Makrickas vlerësoi rëndësinë ndërkombëtare të Bazilikës dhe lidhjen e saj me Zojën e Këshillit të Mirë, duke theksuar respektin dhe nderimin që kjo shenjtore ka marrë ndër shekuj dhe përkushtimin e besimtarëve, veçanërisht të martirëve të kishës.

Rektori i Bazilikës, Dom Artur Jaku, theksoi se kjo ekspozitë përfaqëson një hapësirë ku simbolizmat historike shndërrohen në shenja të pranishme që shoqërojnë historinë e shenjtë.

Ekspozita ofron një përmbledhje të pasur me objekte me vlerë, që dëshmojnë përkushtimin në ruajtjen e trashëgimisë shpirtërore gjatë kohërave, përfshirë periudhën e diktaturës. Një nga eksponatet më të veçanta është veshja tradicionale e Nënë Terezës në rininë e saj, një relike e rrallë me rëndësi historike dhe shpirtërore.

Ekspozita do të qëndrojë e hapur për publikun, duke ofruar mundësi reflektimi dhe njohjeje më të thellë mbi trashëgiminë historike dhe fetare të zonës.