Emma Watson: Barazia kërkohet çdo ditë…edhe me faturat

Emma Watson, ambasadore e Kombeve të Bashkuara për të drejtat e femrave, në Ditën Ndërkombëtare të tyre u bëri thirrje që të qendrojnë të forta dhe të luftojnë për barazinë.

Aktorja 24-vjeçare britanike tha se lufta për barazi zhvillohet çdo ditë, në çdo moment dhe për këtë solli një shembull të thjeshtë nga përvoja personale.

“Ftova një mikun tim për darkë në restorantin tim të preferuar. Kur u ngritëm këmbëngula që të paguaja faturën dhe ai u ndje pak keq, ose kështu m’u duk mua. Por besoj se këtu nuk ka asgjë për t’u ndjerë keq. Unë e ftova, unë zgjodha restorantin unë do paguaja. I thashë herën tjetër më fto ti, paguaj ti!”, thotë Watson.

E bërë e famshme me rolin e Hermione Granger në sagën e “Harry Potter”, 24-vjeçarja foli edhe për kërcënimet që mori në ditën që do mbante fjalim para Kombeve të Bashkuara për të drejtat e grave.

Kërcënimi lidhej me publikimin e disa fotove nudo, që një faqe interneti pretendonte si i kishte siguruar.

“E dija që ishte një shantazh, e dija që fotot nuk ekzistonin dhe mendova se gjithçka bëhej për të më ndaluar fjalën para Kombeve të Bashkuara. Unë këmbëngula dhe mbajta fjalimin tim duke zemëruar pak edhe vëllain, që besonte se më pas do publikoheshin fotot e mia nudo”, rrëfen Watson.