Evangeline Lilly zbulon arsyen e largimit nga Hollywood-i

Aktorja e njohur Evangeline Lilly, e cila fitoi famë botërore me rolin e Kate Austen në serialin Lost dhe si Hope van Dyne në filmat e Marvel-it Ant-Man, ka zbuluar arsyet që e shtynë të largohej nga Hollywood-i, duke zgjedhur një jetë larg vëmendjes mediatike.

Lilly, e cila vendosi të tërhiqej nga aktrimi në vitin 2020, ka shpjeguar se fama nuk ishte diçka që e kishte dëshiruar ndonjëherë. Për të, të qenit e famshme ishte një çmim që duhej të paguante për përfitimet financiare që i sillte karriera në industrinë e filmit.

Një tjetër arsye që ndikoi në vendimin e aktores lidhej me shëndetin e saj. Sipas deklaratave të saj, pas largimit nga Hollywood-i, ajo ka vënë re përmirësime të ndjeshme në gjendjen shëndetësore.

Lilly ka bërë të ditur se dëshiron t’i kushtojë më shumë kohë familjes, jetës personale dhe aktiviteteve humanitare, larg presionit të vazhdueshëm që shoqëron famën.

Besimi i saj i krishterë ka luajtur gjithashtu një rol të rëndësishëm në këtë vendim. Aktorja ka folur për dëshirën për të ndërtuar një jetë të bazuar te vlerat personale dhe për të gjetur kuptim përtej suksesit profesional, parave dhe vëmendjes publike.

Ajo ka përmendur edhe angazhimin e saj në punë humanitare, përfshirë përvojën në Ruandë, duke treguar se dëshiron të ketë një ndikim të drejtpërdrejtë në jetën e njerëzve.