Facebook synon ta kthejë Messenger në një WhatsApp të ri

Rrjeti social synon që aplikacionin e saj të mësazheve ta transformojë në një platformë të plotë të “chat” e cila do të funksionojë ngjashëm sikurse aplikacioni i saj gjigant të cilin e bleu për 19 miliardë dollarë.

Aplikacionet e mesazheve në kohë reale janë duke rivalizuar shumë me rrjetet sociale, sidomos për nga sasia e kohës që përdoruesit e shpenzojnë në ato, dhe këtë gjë tashmë e ka kuptuar rrjeti më i madh social në botë – Facebook.

Për këtë, Facebook është duke menduar që aplikacionin e saj Messenger ta zgjerojë me funksione dhe tipare të reja të shumta.

Në mesin e karakteristikave të reja do të jenë edhe ato për shpërndarjen e përmbajtjes, qasje në aplikacionet e palëve të treta si dhe mundësinë e marrjes së shërbimeve tjera nga Facebook Messenger.

Sipas TechCrunch thuhet se Mark Zuckerberg dhe ekipi i tij janë duke menduar që ta kthejnë këtë shërbim në një platformë për shumë burime.

Në mesin e shërbimeve tjera që do të ofrojë Messenger është edhe mundësia për të ndërvepruar me miqtë, kontaktimi i operatorit tuaj mobil nga aplikacioni, apo edhe shikimin e videove virale të ditës.

Facebook Messenger synon që të rivalizojë ashpër edhe me rivalët e saj aziatik sikurse WeChat dhe Line që janë shndërruar nga aplikacionet e komunikimit në platforma të plota që përfshijnë mundësinë e realizimit të thirrjeve, dhe përdorimit të aplikacioneve dhe lojërave të ndryshme.

Sipas TechCrunch, risitë zyrtare të këtij aplikacioni do të shfaqen në konferencën e zhvilluesve të Facebook, F8, që do të mbahet më 25 mars.