Feronikeli 74 mposht Ballkanin në frymën e fundit, Cërvadiku hero i drenicasve

Feronikeli 74 ka shkaktuar një nga befasitë e javës së 13-të në Superligën e Kosovës, duke e mposhtur Ballkanin me rezultat 1:0, siç njofton Telegrafi.

Drenicasit vazhdojnë formën e mirë në kampionat, pas fitores ndaj Dukagjinit dhe barazimit me Malishevën në javët e fundit.

Pjesa e parë e takimit u karakterizua me lojë të barabartë nga të dyja skuadrat dhe, pavarësisht disa tentimeve, portat mbetën të paprekura në 45 minutat e para.

Edhe në pjesën e dytë loja ishte e baraspeshuar, me vendasit diçka më të rrezikshëm, por për golin u desh të priteshin minutat shtesë: në skenë doli Ibrahim Cërvadiku, i cili shënoi një gol të bukur për fitoren dhe rezultatin përfundimtar 1:0.

Pas kësaj fitore, Feronikeli 74 e sheh veten në pozitën e shtatë me 15 pikë, ndërsa Ballkani mbetet me 19 pikë.

Në ndeshjen e ardhshme, Feronikeli 74 udhëton te Drita, ndërsa Ballkani e pret Gjilanin.