Turistë grekë dëshmitarë të sulmit në Krakov, konsullata konfirmon: asnjë grek mes viktimave

Një grup turistësh grekë u gjendën dëshmitarë të sulmit me armë që tronditi të shtunën qendrën e Krakovit në Poloni, ku një person i armatosur hapi zjarr përpara një lokali të njohur, duke vrarë gjashtë persona dhe plagosur 15 të tjerë, siç njofton Ekathimerini duke iu referuar agjencisë Associated Press dhe agjencisë greke të lajmeve ANA-MPA.

Sipas raportimit të Ekathimerini, grupi i agjencisë së Athinës Hermes Travel Office ndodhej pranë vendngjarjes në momentin e të shtënave; në panik turistët u shpërndanë dhe u fshehën, por më pas u kontaktuan të gjithë dhe u konfirmua se janë mirë. Një anëtar i grupit i tha ERTnews: “Ishim pranë vendit dhe dëgjuam të shtënat. U krijua panik dhe secili kërkonte ku të fshihej. Për fat të mirë, asnjëri prej nesh nuk u lëndua”, ndërsa drejtuesi i grupit, Giorgos Papadopoulos, konfirmoi se të gjithë anëtarët janë shëndoshë e mirë.

Konsullata greke në Krakov ka qenë në kontakt me autoritetet vendase dhe me grupin e turistëve. Konsullja Anna Lappa deklaroi, sipas Ekathimerini: “Nuk ka grekë mes viktimave. Qytetarët grekë që ndodheshin aty pranë janë në gjendje shoku, por të gjithë janë të sigurt.”

Mediat polake e kanë identifikuar autorin si Jaroslaw K., 58 vjeç, punëtor ndërtimi i papunë nga një qytezë pranë Krakovit, i cili vrau veten kur mbërriti policia. Sipas policisë, motivet po hetohen, autori mbante disa pistoleta dhe kishte probleme me alkoolin, por pa precedentë penalë dhe pa lidhje kriminale; deri tani nuk ka asnjë tregues se sulmi ishte terrorizëm.