Prishtina fiton me mund ndaj Vushtrrisë dhe shkëputet në krye

Prishtina ka marrë një fitore të rëndësishme në udhëtim, duke e mposhtur Vushtrrinë me rezultat 2:1 në javën e 13-të të Superligës së Kosovës, siç njofton Telegrafi.

Bardhëkaltërit e dominuan sfidën në posedim dhe kaluan në epërsi në minutën e 28-të, kur Rin Ahmeti realizoi pas një aksioni të bukur.

Epërsinë e dyfishoi Assane Diatta në fillim të pjesës së dytë, në minutën e 49-të.

E tëra që arriti Vushtrria ishte goli i nderit, i realizuar nga Urim Statovci në minutën e 79-të, pas një gabimi në mbrojtjen mysafire.

Kësisoj, Prishtina shkon në 32 pikë, pesë mbi Malishevën e vendit të dytë, ndërsa Vushtrria mbetet e fundit me vetëm tri pikë.