Fitime kolosale nga Shqipëria, FSHF njofton tifozët për ndeshjen ndaj Finlandës

Kombëtarja shqiptare e futbollit do të luajë këtë të enjte në “Air Albania” ndaj Finlandës një ndeshje shumë vendimtare për ecurinë e saj në Ligën e Kombeve. Dhe mbështetja e publikut do të jetë e jashtëzakonshme.

Kjo, pasi FSHF ka bërë të ditur sot se janë shitur të gjitha biletat për ndeshjen në fjalë dhe të enjten, pritet që stadiumi të jetë me të gjitha tribunat e mbushura nga mbështetësit kuqezi. Një situatë që padyshim do të karikojë më shumë ekipin përballë skuadrës e cila i ka shkaktuar humbjen e vetme në këtë edicion të Ligës së Kombeve dhe duket si rreziku më serioz për të.

Edhe për FSHF, një lajm i tillë sigurisht që është mjaft i rëndësishëm pasi shitja e të gjitha biletave sjell të ardhura të rëndësishme ekonomike. Në çdo ndeshje janë qindra mijëra euro që hyjnë në arkat e institucionit i cili në këto vite ka përfituar shuma marramendëse nga interesimi i tifozëve për kuqezinjtë, duke arritur në rreth 2 milionë euro për ndeshjen ndaj Anglisë një vit më parë.