Problem i ri për Paunovićin: Serbia edhe pa Filip Kostićin ndaj Gjermanisë dhe Greqisë

Përzgjedhësi i Serbisë, Veljko Paunović, ka marrë një tjetër lajm të keq para ndeshjeve të nëntorit në Ligën e Kombeve: sipas raportimit të Sport Klub-it, ai nuk do të mund të llogarisë as te Filip Kostići, i cili ka anuluar ardhjen në grumbullim për shkak të një dëmtimi.

Futbollisti i PSV-së e ka anuluar ardhjen të hënën dhe nuk është paraqitur as në stërvitjen e pasdites në Qendrën Sportive të Federatës së Futbollit të Serbisë. Siç njofton Sport Klub-i, mungesa e tij është një problem i madh për stafin teknik, sepse zgjedhjet në krahun e majtë janë ngushtuar edhe pas dëmtimit të Aleksa Terziçit, ndaj pritet përforcim nga përfaqësuesja e të rinjve, ku në ndeshjet e fundit si alternativë në atë pozicion është ftuar Stefan Bukinac.

Kostići, 34 vjeç, është riafirmuar muajt e fundit te PSV-ja, ku ka qenë titullar me minuta të rëndësishme: ai ka munguar vetëm në ndeshjen ndaj Willem II, ndërsa dha kontribut të dukshëm në fitoren ndaj Portos në Ligën e Evropës. Me 76 paraqitje me fanellën e përfaqësueses, ai është një nga lojtarët më me përvojë të kësaj gjenerate, ndaj mungesa e tij në ndeshjet e nëntorit ka peshë të veçantë.

Lista e mungesave të Serbisë është e gjatë: për ndeshjet me Gjermaninë dhe Greqinë, Paunovići nuk do të ketë në dispozicion as Strahinja Pavloviçin, as Dushan Vllahoviçin e as Aleksa Terziçin, ndërsa ndaj gjermanëve, për shkak kartonësh të verdhë, nuk do të mund të luajnë as Sasha Lukiçi e as Nemanja Maksimoviçi.

Serbia e pret Gjermaninë të premten në stadiumin “Rajko Mitić” në Beograd, ndërsa tri ditë më pas udhëton në Volos për ndeshjen ndaj Greqisë.