Foda pas fitores me Irlandën: “Na mungoi fati në pjesën e parë, jam i kënaqur me repartin defanziv”

Kosova e ka nisur me fitore edicionin e ri të Nations League. “Dardanët” triumfuan 1-0 ndaj Irlandës në stadiumin “Fadil Vokrri” në Prishtinë, me golin e Vedat Muriqit.

Pas ndeshjes, trajneri Franco Foda u shfaq i kënaqur me paraqitjen e ekipit gjatë gjithë 90 minutave, duke thënë se ekipi i tij dominoi lojën dhe se vetëm fati i mungoi në pjesën e parë për të kaluar në epërsi më herët.

“Gëzimi ishte i madh, sidomos pas lojës që zhvilloi ekipi gjatë 90 minutave, ishte pjesë e fatit që nuk udhëheqëm që në pjesën e parë”, tha Foda.

Trajneri u shpreh i kënaqur edhe me repartin defanziv: “Më pëlqeu reparti defanziv, siç u pa në lojë nuk lejuam asgjë për irlandezët, u mbrojtëm mirë. Më pëlqeu edhe qetësia, sidomos pas pjesës së parë iu thash edhe lojtarëve që të jenë të qetë të vazhdojnë lojën ashtu siç duhet sepse goli do të vijë patjetër”.

Foda vlerësoi gjithashtu paraqitjet e lojtarëve të krahut në sulm: “Jam i kënaqur edhe me lojtarët e krahut në sulm sidomos Zhegrova që luajti për 70 minuta ndërkohë që ka kohë që ai nuk ka luajtur për 70 minuta si në skuadër dhe në kombëtare, po ashtu edhe Baton Zabërgja, në përgjithësi jam i kënaqur”.

Kosova e vazhdon rrugëtimin në Nations League me ndeshjen e radhës në transfertë kundër Austrisë, më 27 shtator.

Burimi: Klan Kosova