FOKUS – SHBA nis fushatën ”Economic Outcast” për të izoluar Iranin

UASHINGTON, 24 gusht /ATSH-DPA/ – Sekretari i Thesarit i SHBA-së, Scott Bessent, njoftoi sot një fushatë të re gjithëpërfshirëse sanksionesh që synonin lidhjet ekonomike të Iranit me pjesën tjetër të botës, ndërsa Uashingtoni kërkon të rrisë presionin mbi Teheranin gati gjashtë muaj pas fillimit të luftës.

“Përcaktimet e reja të sanksioneve sektoriale të lëshuara sot synojnë pesë nga linjat më jetësore të Iranit që ai shfrytëzon në vende të tjera: asetet dixhitale, teknologjinë, arin, aviacionin dhe transportin detar”, paralajmëroi Bessent në një konferencë për shtyp.

Masat janë pjesë e një fushate të quajtur ”Economic Outcast” (“I përjashtuari ekonomik”), që synon ndërprerjen e burimeve të të ardhurave për Korpusin e fuqishëm të Gardës Revolucionare Islamike të Iranit dhe detyrimin e Teheranit për lëshime, duke përfshirë rihapjen e Ngushticës së Hormuzit.

Përveç kërcënimit të vendeve që vazhdojnë të bëjnë biznes me Iranin me sanksione dytësore, Bessent paralajmëroi se çdo institucion financiar që lehtëson pastrimin e parave në emër të Teheranit do të shkëputet nga sistemi i dollarit amerikan. Ai tha se një “njoftim i madh” në lidhje me një institucion të tillë do të bëhet deri në fund të javës.

Megjithatë, Bessent ofroi pak detaje specifike pavarësisht premtimeve të presidentit Donald Trump për një ofensivë ekonomike të paprecedentë.

Kryetari i parlamentit iranian, Mohammad Bagher Ghalibaf, i hodhi poshtë kërcënimet e SHBA-së, duke thënë se “askush nuk e beson fushatën bombastike të tyre”.

Ai argumentoi në X se Uashingtoni nuk ishte ekonomikisht i aftë të kufizonte më tej marrëdhëniet e tij me vendet e tjera.

Javën e kaluar, Trump ishte zotuar për veprime në një “shkallë historike” dhe tha se sanksionet do të ishin “operacioni më shkatërrues ekonomik” i nisur ndonjëherë kundër një vendi, duke e krahasuar atë me një “D-Day ekonomike” për Iranin.

I pyetur pse masat paralizuese të parashikuara të hënën nuk po vendoseshin menjëherë, Bessent tha se “Uashingtoni ishte i përgatitur të lëvizte shumë shpejt”.

“Thesari ka hartëzuar çdo nyje, çdo lehtësues dhe çdo rrjet që Irani ka përdorur për të kontrabanduar naftë dhe për të shmangur sanksionet”, tha Bessent.

“Duke filluar nga sot, veprimet e Thesarit dhe agjencive të tjera do të shtrëngojnë litarin dhe do të bllokojnë çdo burim të mundshëm të të ardhurave që financon IRG-në”, shtoi ai, duke përdorur një shkurtim për Gardën Revolucionare.

Bessent tha se ekipet nga Thesari dhe departamentet e Shtetit dhe ushtria amerikane po takoheshin me homologët ndërkombëtarë për t’i shtyrë ata të ndërpresin aktivitetet e identifikuara nga Uashingtoni.

”Vendeve u ishin dhënë afate për të ndaluar këto aktivitete”, tha ai, duke paralajmëruar se përndryshe Uashingtoni do të ndërmerrte veprime të njëanshme./ a.jor.