FOKUS – Teherani: Bisedimet me SHBA-në nuk ekzistojnë

TEHERAN, 3  gusht /ATSH -ANSA/ Ministria e Jashtme e Iranit ka mohuar deklaratat e presidentit amerikan Donald Trump, duke theksuar se aktualisht nuk po zhvillohen negociata me Shtetet e Bashkuara.

Një ditë më parë, Trump kishte deklaruar se kishte pezulluar sulme të rënda amerikane të planifikuara ndaj Iranit gjatë fundjavës, pas presionit të aleatëve të Gjirit dhe ndërmjetësve, të cilët favorizonin diplomacinë në vend të luftës.

Sipas tij, ishte arritur një mirëkuptim për Ngushticën e Hormuzit dhe pritej një marrëveshje për çarmatimin bërthamor, ndërsa bisedimet me Teheranin, sipas Trump, kishin rifilluar që pasditen e djeshme.

Megjithatë, zëdhënësi i Ministrisë së Jashtme iraniane, Esmail Baghaei, sqaroi se Irani po zhvillon bisedime vetëm me Omanin, të kufizuara në menaxhimin dhe garantimin e sigurisë së lundrimit në Ngushticën e Hormuzit.

“Dy vendet po i zhvillojnë seriozisht këto negociata për të garantuar sigurinë e lundrimit në Ngushticën e Hormuzit”, tha Baghaei, duke nënvizuar se bisedimet nuk kanë të bëjnë me marrëdhëniet Iran-SHBA.

Ai shtoi gjithashtu se “lufta e Shteteve të Bashkuara kundër Iranit është një luftë kundër të gjithë rajonit” dhe se vendet e rajonit kanë një pjesë të përgjegjësisë për situatën aktuale.

Duke iu referuar thirrjes së Arabisë Saudite drejtuar Uashingtonit për t’i dhënë fund konfliktit, Baghaei deklaroi se “SHBA-ja ka shkaktuar pasiguri në rajon, por fuqia parandaluese e Iranit ka ndalur armikun”.