Forcat e Armatosura: Operacion për largimin e mbetjeve të rrezikshme kimike

Në zbatim të urdhrit të shefit të Shtabit të Përgjithshëm të Forcave të Armatosura (SHSHPFA), si dhe të komandantit të Forcës Tokësore, prej disa ditësh efektivat e Kompanisë së Mbrojtjes nga Armët e Dëmtimit në Masë (MADM) të Batalionit të Mbështetjes me Luftim të Forcës Tokësore,(bMLFT) janë angazhuar në mbështetje të operacionit që po zhvillon Komanda e Mbështetjes, për pastrimin dhe zhvendosjen e materialeve dhe mbetjeve kimike nga depot e Qafë – Mollës.

Operacioni që këto forca po zhvillojnë është delikat, por jo i papërballueshëm, pasi trajnimi që ato kanë kryer dhe kryejnë vazhdimisht gjatë stërvitjes së tyre ditore, i ka aftësuar në kryerjen me sukses të detyrave të kësaj natyre.  Sipas drejtuesit të trupave të kimisë në terren, toger Edison Veliko, deri në momentet që flasim është kryer një volum i madh pune për zhvendosjen e mbetjeve kimike, por ngelet ende shumë për të bërë. Kjo është edhe arsyeja, pse nuk mund të përcaktohet një datë e saktë, e përfundimit të procesit. Toger Veliko, garanton për profesionalizëm dhe angazhim maksimal të trupave që ai drejton, për përfundimin sa më shpejt dhe mbi të gjitha me cilësi dhe sukses të plotë të kësaj detyre, sa delikate po aq edhe të rëndësishme.

Trupa e kimisë përbëhet nga një personel i certifikuar për zhvillimin e këtij lloj operacioni dhe janë të pajisura me komplete mbrojtëse individuale nga më modernet.