Fotot e reja të Billie Eilish bëhen virale, fansat zbulojnë një ndryshim të papritur

Këngëtarja e njohur Billie Eilish është bërë sërish temë diskutimi në rrjetet sociale, pasi fotografitë e saj të fundit kanë nxitur spekulime mes fansave se ajo mund t’i jetë nënshtruar një ndërhyrjeje kirurgjikale për zvogëlimin e gjoksit.

Gjithçka nisi pas publikimit të disa fotografive të reja të artistes, në kuadër të bashkëpunimit të saj me markën luksoze të bizhuterive John Hardy. Në imazhet promovuese, 24-vjeçarja shfaqet me veshje më të ngushta ndryshe nga stili i saj karakteristik me rroba të gjera.

Kjo paraqitje ka bërë që përdoruesit e rrjeteve sociale të krahasojnë fotografitë e vjetra me ato të fundit, duke ngritur dyshime se këngëtarja mund të ketë kryer një ndërhyrje për zvogëlimin e gjoksit.

Diskutimi është përhapur me shpejtësi në platformën X, ku komentet kanë qenë të shumta dhe të ndara.

Disa fansa kanë shprehur habi dhe madje zhgënjim për ndryshimin e pretenduar në pamjen e këngëtares, ndërsa të tjerë kanë dalë në mbrojtje të saj, duke theksuar se vendimet që lidhen me trupin janë krejtësisht personale.

“Dhimbjet e shpinës nga gjoksi i madh nuk janë shaka. Shëndeti dhe rehatia duhet të vijnë të parat”, shkroi një përdorues në mbështetje të artistes.

Të tjerë kanë ngritur mundësinë që ndryshimi në pamjen e saj të vijë nga humbja e peshës, veshjet, pozat apo këndet e fotografimit, dhe jo domosdoshmërisht nga një ndërhyrje kirurgjikale.

Deri më tani, nuk ka asnjë konfirmim nga Billie Eilish apo përfaqësuesit e saj se ajo ka kryer një operacion të tillë.

Nuk është hera e parë që këngëtarja përballet me komente dhe spekulime për fizikun e saj. Në vitin 2020, ajo publikoi një video që u bë virale, përmes së cilës reagoi ndaj kritikave për peshën dhe mënyrën se si vishej.

“Nëse vesh rroba të rehatshme, nuk jam femër. Nëse i heq shtresat e rrobave, më quajnë të pamoralshme. Edhe pse nuk e keni parë kurrë trupin tim, përsëri më gjykoni”, ishte mesazhi i saj në atë kohë.