Savannah Chrisley zbulon gjininë e foshnjës: pret një djalë

Savannah Chrisley dhe bashkëshorti i saj Jason Galanis presin një djalë. Ylli i reality show-t e njoftoi lajmin të hënën në një video në Instagram, ku preu një fetë nga një tortë në formë zemre duke zbuluar mbushjen blu brenda, puthi Galanis dhe tregoi rroba e aksesorë blu për foshnja pranë prindërve të saj, Todd dhe Julie Chrisley, siç njofton Page Six.

Në përshkrimin e videos ajo e quajti foshnjën “djali ynë i ëmbël mrekulli” dhe shkroi se ai është gjithçka për të cilën çifti është lutur e më shumë, si dhe kujtesa më e bukur se planet e Zotit janë gjithmonë më të mëdha se të njerëzve. Të nesërmen, të martën, Savannah u fotografua në Nashville duke treguar barkun në rritje gjatë një daljeje për drekë, me një bluzë të zezë të shkurtër dhe pantallona sportive, ndërsa unaza e saj e madhe me diamant binte në sy. Në foto të tjera, Galanis shihej duke pirë kafe me vjehrrin e tij, Todd Chrisley, dhe të dy dukeshin të qeshur e të relaksuar.

Zbulimi i gjinisë vjen pak ditë pasi Savannah, 29 vjeçe, njoftoi më 27 tetor se ishte e fejuar dhe priste fëmijën e parë me Galanis, 56 vjeç. Ndërkohë u bë e ditur se çifti ishte martuar fshehurazi më 14 korrik në një kishë baptiste në Ishujt Kajman dhe se Galanis i kishte propozuar në dhjetor të vitit 2025 në Kajman, pa i bërë asnjë presion për përgjigjen, duke i thënë se unaza ishte thjesht një shprehje dashurie.

Ky është zhvillimi më i ri i një historie që ka zgjuar shumë reagime prej fundit të tetorit, kur u bë publik edhe paralajmërimi i vëllait të Galanis ndaj çiftit. Në postimet e saj të fundit, Savannah i është përgjigjur atmosferës kritike duke thënë se asnjë urrejtje nuk mund ta errësojë gëzimin e pritjes së foshnjës, të cilën e quan bekimin më të madh dhe kapitullin më të ëmbël të jetës së saj.