Franca shoqëron me anije luftarake cisternat e naftës përmes Detit të Kuq

Franca ka vendosur anije luftarake për të shoqëruar cisternat e naftës përmes Detit të Kuq dhe ngushticës Bab el-Mandeb, konfirmoi zëdhënësi i Shtabit të Përgjithshëm të ushtrisë franceze Xavier Rival, siç njofton Al Jazeera në liveblogun e saj të sotëm.

Sipas Rival, të paktën 10 anije janë shoqëruar në javën e fundit, në kuadër të misionit detar të Bashkimit Europian. Lëvizja vjen mes tensioneve të rritura mbi trafikun detar në rajon, ndërsa kërcënimet për rrugët kryesore të transportit të naftës po shtohen.

Presidenti francez Emmanuel Macron tha muajin e kaluar se Franca po dërgon “ushtarë, radarë dhe sisteme mbrojtjeje” në Yanbu të Arabisë Saudite për të ndihmuar në mbrojtjen e qyteteve kundër sulmeve të mundshme iraniane. Parisi po e forcon kështu praninë e tij ushtarake në rajon, krahas aleatëve perëndimorë.