Diaspora serbe thyen rekord: 73.000 qytetarë të regjistruar për votim jashtë vendit

Interesimi i diasporës serbe për të votuar në zgjedhjet e parakohshme parlamentare të 25 tetorit ka thyer të gjitha rekordet: deri më tani janë regjistruar më shumë se 73.000 qytetarë të Serbisë për votim jashtë vendit, bëri të ditur sot anëtari i Komisionit Republikan Zgjedhor (RIK), Dushan Dinçiç, në një deklaratë për agjencinë Beta të cituar nga Nova.rs.

Dinçiç tha se Ministria e Punëve të Jashtme do t’i dorëzojë nesër RIK-ut propozimin për hapjen e qendrave të votimit jashtë vendit dhe se, sipas interesimit të deritanishëm, pritet hapja e 130 qendrave votimi. “Interesimi i shtetasve tanë për votim jashtë vendit është i jashtëzakonshëm, deri më tani janë regjistruar më shumë se 73.000, dhe regjistrimi vazhdon deri më 3 tetor”, tha Dinçiç.

Ai kujtoi se nesër është afati i fundit që Ministria e Jashtme të dorëzojë propozimin dhe se RIK-u duhet ta miratojë atë më së voni deri të dielën, raporton Nova.rs. Në zgjedhjet e kaluara parlamentare jashtë vendit u hapën 80 qendra votimi. “Tani interesimi është dukshëm më i madh dhe shpresoj që MPJ-ja të mos e pengojë dhe t’u mundësohet të gjithëve të votojnë. Për hapjen e një qendre votimi duhet të regjistrohen së paku 100 votues në atë qytet”, shpjegoi Dinçiç.

Edhe anëtari i Komisionit për rishikimin e listës së votuesve, Ognjen Rashuo, njoftoi se deri më tani janë lëshuar gjithsej 73.000 vendime për votim jashtë vendit. Në zgjedhjet e kaluara, sipas tij, numri ishte rreth 40.000 — gjë që flet për interesim të jashtëzakonshëm të diasporës për të dalë në këto zgjedhje parlamentare, pavarësisht pengesave serioze me të cilat u përballën javët e fundit në përpjekje për të regjistruar qendra të reja votimi.

Regjistrimi vazhdon deri më 3 tetor, ndërsa lista e votuesve në komuna mbyllet më 9 tetor.