FRANCË – G7 diskuton krizat globale dhe humbjen e republikanëve në zgjedhjet e mesmandatit në SHBA

PARIS, 9 nëntor /ATSH-AFP/- Ministrat e Jashtëm të vendeve të Grupit të Shtatë (G7) janë mbledhur në Paris për një takim dyditor, ku në fokus janë lufta në Ukrainë, konflikti me Iranin, siguria energjetike dhe pasojat e humbjeve të republikanëve në zgjedhjet e fundit të mesmandatit në SHBA.

Takimi, i cili zhvillohet sot edhe nesër nën presidencën franceze të G7, shënon gjithashtu paraqitjen e parë të sekretarit amerikan të Shtetit, Marco Rubio, përpara homologëve të tij ndërkombëtarë pas zgjedhjeve, në të cilat demokratët fituan terren dhe republikanët humbën kontrollin e Kongresit.

Sipas diplomatëve të cituar nga “Reuters”, aleatët e Uashingtonit synojnë të vlerësojnë, nëse rezultati elektoral do të ndikojë në politikën e jashtme të administratës së presidentit Donald Trump, veçanërisht në qëndrimin ndaj Ukrainës, Lindjes së Mesme dhe marrëdhënieve me partnerët tradicionalë.

Megjithatë, diplomatët paralajmërojnë se humbjet elektorale mund të kufizojnë hapësirën politike të administratës amerikane, por nuk pritet domosdoshmërisht një rikthim te politika tradicionale e bashkëpunimit shumëpalësh të SHBA-së.

Një nga çështjet kryesore të diskutimit është lufta në Ukrainë. Ministrat evropianë pritet t’i kërkojnë sekretarit amerikan të Shtetit, Marco Rubio, që çdo marrëveshje për përfundimin e konfliktit të garantojë sigurinë e Ukrainës dhe të mos arrihet pa pjesëmarrjen e vendeve evropiane.

Takimi zhvillohet në prag të negociatave trepalëshe mes Ukrainës, Rusisë dhe SHBA-së, të planifikuara për 10 dhe 11 nëntor në Abu Dabi.

Bisedimet pritet të përqendrohen te mundësitë për t’i dhënë fund luftës dhe te garancitë e sigurisë për periudhën pas konfliktit.

Edhe konflikti me Iranin është në qendër të diskutimeve. Vendet evropiane kërkojnë shmangien e një përshkallëzimi të ri ushtarak dhe rikthimin e negociatave diplomatike.

Më herët, Rubio deklaroi se bisedimet me Teheranin nuk kanë shënuar përparim, ndërsa theksoi se kërkesat iraniane janë të papranueshme për Uashingtonin.

Në agjendën e takimit përfshihen gjithashtu situata në Lindjen e Mesme, Sudan, Bririn e Afrikës, Venezuelë, Kubë dhe Haiti, si dhe siguria energjetike, ndihma humanitare dhe rreziqet që lidhen me inteligjencën artificiale.

Ministrat do të diskutojnë edhe kërcënimet hibride, përfshirë sulmet kibernetike dhe fushatat e dezinformimit.

Në disa takime marrin pjesë edhe përfaqësues të vendeve partnere të ftuara nga Franca, mes tyre Ukraina, Arabia Saudite, Brazili, Egjipti dhe Koreja e Jugut.

Takimi i Parisit zhvillohet në një moment të rëndësishëm për marrëdhëniet mes SHBA-së dhe aleatëve të saj, të cilët kërkojnë të kuptojnë nëse ndryshimet në Kongresin amerikan, do të ndikojnë në drejtimin e politikës së jashtme të administratës Trump. /