Francë, përfshihet nga flakët Bazilika e Shën Donatien

Një zjarr gjigant ka përfshirë Bazilikën e Saint-Donatien në qytetin e Nantës, në perëndim të Francës. Flakët shpërthyen pak pas meshës së mëngjesit, por fatmirësisht nuk pati të lënduar, pasi besimtarët u evakuan që të gjithë me shpejtësi nga godina.

Në vendngjarje u dërguan më shumë se 40 zjarrfikës, të cilët nuk arritën megjithatë të pengonin përhapjen e flakëve, që gllabëruan me shpejtësi pjesën e sipërme të ndërtesës historike, duke shkatërruar krejtësisht çatinë e saj.

Autoritetet nuk kanë mundur ende të përcaktojnë shkaqet e zjarrit, por hetimi vazhdon. Bazilika në fjalë është një prej dy të tillave që ka qyteti i Nantës dhe daton që prej shekullit të 19-të. Ajo është ngritur në nder të Shën Donatien dhe Shën Rogatien, dy martirë të rinj, të cilët refuzuan të hiqnin dorë nga besimi i tyre i krishterë.