FRANCË – Skandali i abuzimeve seksuale të Al-Fayed, arrestime dhe kontrolle në hotelin “Ritz” dhe vilën “Windsor” në Paris

– Policia franceze ka kryer kontrolle në hotelin luksoz “Ritz” në Paris dhe në dy prona të tjera, të lidhura me biznesmenin e ndjerë egjiptian, Mohamed Al-Fayed, ndërsa disa persona janë ndaluar për t’u marrë në pyetje, në kuadër të hetimit ndaj një rrjeti të dyshuar të trafikimit dhe shfrytëzimit seksual të grave, sipas “Le Figaro”.

Operacionet u zhvilluan në mesin e tetorit, por u bënë publike sot nga Prokuroria e Parisit, e cila konfirmoi se hetimet synojnë të identifikojnë personat që mund të kenë ndihmuar Mohamed Al-Fayed dhe vëllain e tij, Salah Al-Fayed, në organizimin e një rrjeti ndërkombëtar të dyshuar të trafikimit të grave.

Kontrollet u kryen në hotelin “Ritz” dhe në rezidencën historike “Villa Windsor”, në Paris, si dhe në pronën e mëparshme të biznesmenit, “Castel Sainte-Thérèse”, në Saint-Tropez, në Rivierën Franceze.

Gjatë operacionit, disa persona u ndaluan për t’u marrë në pyetje. Autoritetet kanë sekuestruar kompjuterë, telefona dhe pajisje të tjera elektronike, të cilat po analizohen për të mbledhur prova dhe për të zbardhur rolin e personave të përfshirë.

Hetimi francez nisi në verën e vitit 2025, pas ankesave të ish-punonjëseve dhe asistenteve personale të biznesmenit.

Prokuroria po heton dyshimet për trafikim të qenieve njerëzore, në kuadër të një grupi të organizuar, shfrytëzim prostitucioni dhe përdhunim.

Si shpërtheu skandali?

Mohamed Al-Fayed ishte një nga biznesmenët më të pasur me origjinë egjiptiane, i njohur si ish-pronar i dyqanit luksoz “Harrods” në Londër, hotelit “Ritz” në Paris dhe klubit anglez të futbollit “Fulham”.

Skandali shpërtheu në shtator 2024, kur televizioni britanik BBC, publikoi një dokumentar me dëshmi të grave, që e akuzonin atë për abuzime seksuale, përfshirë përdhunime dhe shfrytëzim seksual gjatë kohës kur punonin për të.

Më shumë se 20 gra, folën publikisht për përvojat e tyre, duke pretenduar se ishin abuzuar gjatë periudhës kur Al-Fayed drejtonte bizneset e tij.

Sipas dëshmive, disa prej grave ishin rekrutuar përmes ofertave të punës në dyqanin “Harrods” ose si asistente personale të biznesmenit.

Ato pretendonin se u ishte premtuar një karrierë profesionale, por më pas ishin përballur me presion, kërcënime dhe abuzime seksuale.

Disa gra kanë deklaruar se u ishin nënshtruar ekzaminimeve gjinekologjike, pa arsye të justifikuara mjekësore, ndërsa të tjera kanë pretenduar se ishin droguar përpara se të abuzoheshin.

Sipas hetuesve, dyshimet nuk lidhen vetëm me veprimet e biznesmenit, por edhe me ekzistencën e një rrjeti personash, që mund të kenë ndihmuar në rekrutimin, transportimin dhe shfrytëzimin e grave.

Pse po kontrollohet hoteli “Ritz”?

Hoteli “Ritz” në Paris ishte në pronësi të Mohamed Al-Fayed dhe një nga vendet ku ai zhvillonte aktivitetet e tij.

Disa prej grave që e kanë denoncuar kanë deklaruar se janë abuzuar seksualisht në këtë hotel, ku biznesmeni kishte edhe zyra.

Edhe rezidenca “Villa Windsor”, ish-rezidenca mbretërore britanike në Paris, është përmendur nga viktima të pretenduara, si një prej vendeve ku kanë ndodhur abuzime.

Ndërkohë, prona “Castel Sainte-Thérèse” në Saint-Tropez është përfshirë në kontrollet e policisë, për të mbledhur prova që mund të ndihmojnë në zbardhjen e aktivitetit të dyshuar të rrjetit në Rivierën Franceze.

Autoritetet franceze kanë marrë në pyetje të paktën pesë gra, që kanë paraqitur ankesa në këtë çështje, ndërsa hetuesit po shqyrtojnë pajisjet elektronike të sekuestruara.

Hetimet edhe në Britaninë e Madhe

Hetimi në Francë po zhvillohet paralelisht me procedurat në Britaninë e Madhe, ku skandali ka marrë përmasa të mëdha.

Policia Metropolitane e Londrës kishte regjistruar deri në mesin e tetorit 163 raportime për abuzime seksuale, përdhunime dhe shfrytëzime seksuale të lidhura me Mohamed Al-Fayed.

Hetuesit britanikë po shqyrtojnë gjithashtu rolin e personave që dyshohet se kanë lehtësuar veprimtarinë e tij.

Shtatë persona janë marrë në pyetje në Britani të Madhe, por deri në atë periudhë nuk ishte ngritur asnjë akuzë ndaj tyre.

Autoritetet franceze dhe britanike po bashkëpunojnë dhe shkëmbejnë informacione në kuadër të hetimeve.

Mohamed Al-Fayed vdiq në vitin 2023, në moshën 94-vjeçare, pa u përballur me akuza penale për këto pretendime gjatë jetës së tij.

Edhe vëllai i tij, Salah Al-Fayed, përmendet në hetimin për rrjetin e dyshuar.

Hoteli “Ritz” deklaroi se nuk toleron asnjë formë ngacmimi, abuzimi apo sjelljeje të papërshtatshme dhe se është i gatshëm të bashkëpunojë plotësisht me autoritetet gjyqësore.

Hetimet vijojnë për të përcaktuar përgjegjësitë e mundshme të personave të tjerë dhe për të zbardhur mënyrën se si funksiononte rrjeti i dyshuar. /