Ftesa e Ramës, FRD mbledh nesër Këshillin Kombëtar

Fryma e Re Demokratike, pritet që të mbledhë nesër në orën 11:00 Këshillin Kombëtar të saj, ku do të vendosë në lidhje me qëndrimin që do të mbajë pas ftesës së bërë nga kreu i koalicionit, Edi Rama, që kjo parti t’i bashkohet aleancës së majtë në zgjedhjet lokale.

Dy ditë më parë, kreu i qeverisë bëri ftesë të hapur për një bashkëpunim në qeverisjen lokale edhe me Frymën e Re Demokratike, pas arritjes së një marrëveshje paraprake edhe me PDIU-në. Edhe pse burime pranë së majtës konfirmojnë bashkimin e FRD-së në koalicionin e majtë, kjo pritet që të zyrtarizohet nesër. Brenda së majtës përflitet edhe për një marrëveshje paraprake mes PS-së dhe FRD-së, për t’i dhënë kësaj partie të drejtën për të propozuar kandidatin e saj në Bashkinë e Kamzës.

Emri që përflitet është pikërisht ai i Sali Shehut. Ndërkohë që pritet edhe një takim mes kreut e PS-së dhe atij të PBDNJ-së, Vangjel Dule.