G7: Duhet rihapur Hormuzi dhe zgjidhur konflikti në Iran

Ministrat e Financave të vendeve të G7 kanë bërë thirrje për rikthimin e lëvizjes së lirë dhe të sigurt në Ngushticën e Hormuzit, duke theksuar se zgjidhja e konfliktit në Iran është thelbësore për stabilitetin ekonomik global.

Në komunikatën përfundimtare të takimit të zhvilluar në Paris, përfaqësuesit e ekonomive më të mëdha botërore shprehën shqetësimin për pasojat që tensionet në Lindjen e Mesme po shkaktojnë në ekonomi.

Sipas deklaratës, pasiguria globale ka shtuar rreziqet për rritjen ekonomike dhe inflacionin, ndërsa konflikti i vazhdueshëm po ushtron presion mbi zinxhirët e furnizimit me energji, ushqime dhe plehra kimike.

“Pasiguria ekonomike globale ka rritur rreziqet për rritjen dhe inflacionin, në mes të konfliktit të vazhdueshëm në Lindjen e Mesme, veçanërisht përmes presioneve mbi zinxhirët e furnizimit me energji, ushqim dhe plehra, duke prekur veçanërisht vendet më të cenueshme”, thuhet në deklaratë.

Ministrat e G7 theksuan se për të shmangur pasoja më të rënda ekonomike, nevojitet një rikthim i shpejtë i qarkullimit në Ngushticën e Hormuzit, një nga rrugët më të rëndësishme detare për transportin global të naftës.

“Për të zbutur këto ndikime negative, ne e pranojmë se një kthim i shpejtë në lëvizjen e lirë dhe të sigurt përmes Ngushticës së Hormuzit dhe një zgjidhje e qëndrueshme e konfliktit janë të domosdoshme”, përfundon komunikata e G7.