Gabriel Jesus mbërrin në “Camp Nou”, gjithçka gati për transferimin te Barcelona, zbulohen detajet e kontratës

Gabriel Jesus ka mbërritur në Barcelonë për t’u bërë zyrtarisht lojtari më i ri i Barcelonës.

Sulmuesi brazilian, 29 vjeç, pritet të firmosë kontratë me klubin katalanas deri në vitin 2028, me një sezon shtesë si opsion.

Barcelona ka arritur marrëveshje me Arsenalin për transferimin e Gabriel Jesusit për 10 milionë euro, ndërsa marrëveshja parashikon edhe 5 milionë euro të tjera në formë bonusesh, në varësi të objektivave të arritura.

Sulmuesi brazilian mbërriti pasditen e sotme në terminalin e fluturimeve private të aeroportit Barcelona-El Prat, i shoqëruar nga bashkëshortja, vajza dhe djali i tij. Para gazetarëve, Jesus u shfaq i buzëqeshur dhe i emocionuar për aventurën e re.

“Jam shumë i lumtur dhe shumë i kënaqur”, deklaroi ai, ndërsa përshëndeti mediat duke bërë edhe gjestin karakteristik të festimit të golave, sikur po fliste në telefon.

Pas mbërritjes në Barcelonë, Gabriel Jesus u drejtua në hotel, ndërsa më pas do t’i nënshtrohet testeve mjekësore në Hospital de Barcelona dhe në ambientet e Ciutat Esportiva të klubit.

Një nga çështjet më të rëndësishme për Barcelonën është gjendja fizike e sulmuesit, i cili ka kaluar një dëmtim të rëndë në ligamentet e gjurit dhe ka qenë jashtë fushave nga janari deri në dhjetor të vitit 2025. I pyetur për gjendjen e tij fizike, Jesus ishte i qartë: “Jam perfekt.”

Do të ndjekë nga tribuna ndeshjen Barça-Rayo

Gabriel Jesus pritet të jetë i pranishëm sonte në Spotify Camp Nou, ku Barcelona do të përballet me Rayo Vallecanon. Kjo do t’i japë mundësinë brazilianit të takojë nga afër shokët e tij të rinj të skuadrës.

Nëse gjithçka shkon sipas planit dhe kontrollet mjekësore konfirmojnë raportet pozitive që ka marrë Barcelona, lojtari pritet të firmosë kontratën të martën në zyrën e presidentit Joan Laporta dhe më pas të prezantohet zyrtarisht para mediave.

Braziliani nuk pati vazhdimësinë e dëshiruar te Arsenali gjatë pjesës së dytë të sezonit të kaluar për shkak të dëmtimit të rëndë në gju. Ai humbi gjithashtu mundësinë për të qenë pjesë e Brazilit në Kupën e Botës.

Megjithatë, Jesus është rikthyer në stërvitje që nga mesi i korrikut dhe ka marrë minuta edhe në disa ndeshje miqësore gjatë fazës përgatitore.

Te Arsenali, konkurrenca në sulm është rritur ndjeshëm me Kai Havertz dhe Viktor Gyökeres, ndërsa Jesus nuk u aktivizua as në Community Shield kundër Manchester Cityt dhe as në ndeshjen e parë të Premier League ndaj Coventryt.

Barcelona vendosi të lëvizë shpejt në merkato pasi Atletico Madrid refuzoi të negociojë për transferimin e Julián Álvarez. Kështu, klubi katalanas e pa Gabriel Jesusin si një alternativë të përshtatshme për të përforcuar repartin ofensiv.

Trajneri Hansi Flick vlerëson veçanërisht angazhimin defensiv dhe presionin e lartë të brazilianit. Kjo është një cilësi që Jesus e ka treguar gjatë viteve te Palmeiras, Manchester City dhe Arsenal, duke qenë gjithmonë një lojtar i rëndësishëm në fazën e presingut.

Gabriel Jesus pritet të jetë një tjetër alternativë sulmuese për Barcelonën, e cila, pavarësisht largimit të Robert Lewandowskit dhe Ferran Torresit, ka treguar kapacitet të madh ofensiv dhe aftësi për të krijuar raste në dy javët e para të La Ligës.

Tani mbetet vetëm finalizimi i procedurave zyrtare dhe prezantimi i brazilianit si lojtari më i ri i Barcelonës.