Gara për James Bond-in e ri, Robert Pattinson dhe Nicholas Hoult mes finalistëve

Gara për të zgjedhur aktorin që do të pasojë Daniel Craig në rolin e agjentit më të famshëm sekret në botë po bëhet gjithnjë e më interesante. Robert Pattinson dhe Nicholas Hoult janë dy emrat e fundit që i janë bashkuar listës së kandidatëve për James Bond-in e ri.

Sipas raportimeve të mediave ndërkombëtare, aktorët britanikë Robert Pattinson dhe Nicholas Hoult kanë marrë pjesë në prova filmike për të interpretuar personazhin legjendar të James Bond-it në filmin e ardhshëm të sagës “007”.

Lajmi është bërë i ditur nga mediat e huaja, të cilat raportojnë se të dy aktorët janë pjesë e grupit të finalistëve që po shqyrtohen për të marrë përsipër rolin e agjentit sekret.

Ata i bashkohen emrave të tjerë të përfolur, si Callum Turner, Jack Lowden dhe Josh O’Connor, të cilët gjithashtu raportohet se kanë kaluar prova për rolin prestigjioz.

Ndërkohë, këngëtari dhe aktori Harry Styles, si dhe Theo James, janë përmendur gjithashtu si emra që kanë diskutuar mundësinë për t’u bërë James Bond-i i ardhshëm.

Studioja Amazon MGM, e cila tashmë ka në dorë drejtimin krijues të ekskluzivitetit “James Bond”, nuk ka dhënë një koment zyrtar lidhur me emrat e kandidatëve.

Filmi i ri pritet të mbërrijë në kinema në vitin 2028 dhe do të drejtohet nga regjisori i njohur Denis Villeneuve, i famshëm për filmat “Dune”. Skenari do të shkruhet nga Steven Knight, krijuesi i serialit të suksesshëm “Peaky Blinders”.

Deri më tani, detajet rreth historisë së filmit mbeten të fshehta, ndërsa vëmendja kryesore është përqendruar te identiteti i aktorit që do të veshë kostumin ikonik të agjentit 007.