GJELOSHAJ: INVESTIMET E SIGURTA, SHTET MË I FORTË

_{Foto: Qeveria e Malit të Zi / Vlada Crne Gore}

Zëvendëskryeministri për Politikë Ekonomike dhe ministër i Zhvillimit Ekonomik, Nik Gjeloshaj, ka bërë të ditur se Qeveria e Malit të Zi po përgatit një mekanizëm të ri për kontrollin e investimeve të huaja, me synim mbrojtjen e interesave strategjike të shtetit, sigurisë dhe rendit publik, pa cenuar hapjen e vendit ndaj investitorëve.

Gjeloshaj, në një tekst të publikuar me titullin “Investime të sigurta, shtet i fortë”, thekson se investimet e huaja janë një nga faktorët kryesorë të zhvillimit ekonomik, pasi sjellin kapital, vende pune, teknologji dhe njohuri.

Megjithatë, ai vlerëson se në kushtet e ndryshimeve të mëdha gjeopolitike dhe rëndësisë në rritje të infrastrukturës kritike dhe teknologjive të ndjeshme, Mali i Zi duhet të ketë një sistem që mund të identifikojë dhe vlerësojë rreziqet e mundshme.

Qeveria e ka miratuar më 30 korrik propozimin për krijimin e këtij mekanizmi, ndërsa synohet miratimi i një ligji të veçantë për kontrollin e investimeve të huaja.

Sipas Gjeloshajt, Mali i Zi aktualisht nuk ka një sistem të unifikuar për vlerësimin e investimeve nga aspekti i sigurisë dhe rendit publik, ndërsa ligji i ri do të përcaktonte qartë kompetencat, sektorët, kriteret, afatet dhe masat që mund të ndërmerren.

Ministria e Zhvillimit Ekonomik do të ishte organi qendror përgjegjës për procedurën, ndërsa parashihet edhe krijimi i një Këshilli ndërinstitucional, me përfaqësues nga institucionet përgjegjëse për ekonominë, sigurinë, mbrojtjen, financat, energjinë, transportin dhe fusha të tjera.

Kontrolli do të përfshinte investitorë nga vendet e treta, por edhe kompani në Mal të Zi ose në BE që kontrollohen drejtpërdrejt apo tërthorazi nga investitorë të tillë.

Një vëmendje e veçantë do t’u kushtohej sektorëve strategjikë, përfshirë energjetikën, infrastrukturën digjitale dhe të transportit, komunikimet elektronike, sigurinë kibernetike, shëndetësinë, financat, industrinë e mbrojtjes dhe burimet strategjike. Investitorët do të duhet të paraqesin të dhëna për pronësinë, pronarin përfundimtar, burimin e financimit dhe karakteristikat e investimit.

Procedura fillestare do të zgjaste deri në 45 ditë, ndërsa investimi mund të miratohej, të miratohej me masa të caktuara ose, në rast të rrezikut të madh për sigurinë dhe interesin publik, të ndalohej.

Gjeloshaj thekson se qëllimi i mekanizmit nuk është kufizimi i investimeve, por krijimi i një klime më të sigurt dhe më të parashikueshme.

Sipas tij, një shtet me rregulla të qarta është më tërheqës për investitorët seriozë dhe më i aftë të mbrojë interesat e qytetarëve. Ai e lidh këtë reformë edhe me procesin e integrimit evropian, duke theksuar se Mali i Zi duhet të harmonizohet me standardet e BE-së për kontrollin e investimeve të huaja.

Gjeloshaj thotë se forcimi i institucioneve dhe mbrojtja e interesave strategjike janë pjesë e ndërtimit të një shteti më të sigurt dhe më të besueshëm për investime.

“Politika jonë është e qartë: më shumë investime, klimë më e mirë investimi, institucione më të forta dhe mbrojtje më e madhe e interesave strategjike të Malit të Zi”, deklaroi Gjeloshaj.