Gjukanoviq mbërrin në Gjykatën e Lartë në Podgoricë, dëgjohet për aferën Telekom

Ish-presidenti dhe ish-kryeministri i Malit të Zi, Milo Gjukanoviq, mbërriti sot në Gjykatën e Lartë në Podgoricë, ku dëgjohet para gjyqtarit hetues Goran Shçepanoviq për çështjen e njohur si afera “Telekom”, siç njofton Vijesti. Sipas Vijesti-t, bashkë me të mbërriti edhe avokatja e tij Svetlana Vujanoviq, ish-gjyqtare e Gjykatës Supreme dhe ish-zonjë e parë e Malit të Zi.

Dëgjimi ka të bëjë me dyshimet për korrupsion gjatë privatizimit të Telekomit të Malit të Zi në vitin 2005, përkatësisht me pretendimet se përmes kontratave konsulente është mbuluar pagesa e ryshfetit. Kompania shtetërore iu shit atëherë Magyar Telekom-it.

Dëgjimin e propozoi mbrojtësja e interesave pasurore-juridike të shtetit, Bojana Çiroviq, e cila mori përsipër ndjekjen penale në emër të shtetit pasi Prokuroria Speciale e Shtetit (SDT) në gusht të vitit të kaluar e hodhi poshtë kallëzimin penal të organizatës MANS me arsyetimin se kishte ndodhur parashkrimi absolut i ndjekjes penale.

Paneli penal i Gjykatës së Lartë mbajti qëndrimin se në këtë çështje nuk ka ndodhur parashkrim, gjë që hapi rrugën për veprimet provuese. Kallëzimi i MANS-it i vitit 2019 përfshinte Milo dhe Ana Gjukanoviqin dhe persona të tjerë, për dyshime për shpërdorim të detyrës zyrtare, marrje ryshfeti dhe krijim të organizatës kriminale gjatë privatizimit.

Në ditët në vijim janë parashikuar edhe dëgjimet e Oleg Obradoviqit, Ana Gjukanoviqit dhe Veselin Baroviqit, siç njofton RTCG.