Gjini: Kurti më dërgoi ftesë me SMS, nuk shoh seriozitet as qëllim të mirë

Kryetari i Aleancës për Ardhmërinë e Kosovës, Ardian Gjini, ka zbuluar mbrëmë se kryeministri në detyrë, Albin Kurti, i ka dërguar ftesë për takim përmes një mesazhi SMS, ftesë në të cilën ai thotë se nuk sheh as seriozitet, as qëllim të mirë.

Siç raportoi mbrëmë Klan Kosova, Gjini e bëri zbulimin në emisionin “Rubikon”, ku foli për komunikimin e fundit me kreun e Lëvizjes Vetëvendosje në kuadër të përpjekjeve për formimin e institucioneve të reja. “Më dërgoi SMS”, tha Gjini, duke shtuar se në këtë qasje nuk sheh “as seriozitet, as qëllim të mirë”.

Sipas mediave kosovare, Kurti u ka dërguar ftesa krerëve të partive politike për takime lidhur me formimin e institucioneve. Aleanca ka refuzuar takimin me Kurtin, duke i dërguar atij një përgjigje zyrtare në të cilën, në funksion të transparencës, ka publikuar edhe letrën me kërkesat e saj.

Ndryshe ka vepruar Partia Demokratike e Kosovës. Kryetari i saj, Bedri Hamza, konfirmoi mbrëmë se i është përgjigjur ftesës së Kurtit dhe se është i gatshëm për takim nesër në orën 09:00, duke kërkuar që takimi të mbahet në Kuvend, ashtu siç e kërkon rendi institucional.

Kujtojmë se Kurti dhe Hamza u takuan edhe një ditë më parë, takim për të cilin Hamza tha se u diskutua për deklaratën e Kuvendit lidhur me aktgjykimin e Speciales dhe për çështjen e presidentit, por jo për emra konkretë.