Gjoba e Veliajt, PD: Prokuroria të hetojë me shpejtësi falsifikimin

Partia Demokratike i ka kërkuar prokurorisë të hetojë me shpejtësi falsifikimin e firmës së inspektorit bashkiak, Besim Karaj në fletën e gjobës së vendosur nga bashkia e Tiranës.

Fabian Topollaj, këshilltar i djathtë në këshillin bashkiak të Tiranës tha se mbi Erjon Veliajn rëndon akuza e falsifikimit të dokumenteve dhe shpërdorimit të detyrës.

“U zbuluan shkeljet e rënda të Veliajt në përpjekjen e dëshpëruar duke i vendosu gjobë popullit protestues. Nga dje rezulton se kemi të bëjmë me shkelje serioze të ligjit dhe dy vepra të rënda penale, falsifikim dokumentesh dhe shpërdorim detyre. Prokuroria të hetojë me shpejtësi dhe të nxjerrë përgjegjësitë e Veliajt para ligjit. Prokuroria ka rastin të tregojë se ligji funksionon njësoj për të gjithë dhe se Veliaj nuk ka imunitet”, tha Topollaj.