Gjuriq në Këshillin e Sigurimit: Mungesa e konfliktit nuk është siguri për serbët në Kosovë

Ministri i Jashtëm në mandat teknik i Serbisë, Marko Gjuriq, iu drejtua mbrëmjen e së martës Këshillit të Sigurimit të OKB-së, ku po shqyrtohet raporti gjashtëmujor i UNMIK-ut, dhe tha se në raport situata në veri të Kosovës përshkruhet si e qetë, por e brishtë. “Mungesa e konfliktit nuk është e njëjtë me ekzistencën e sigurisë”, tha Gjuriqi, siç njofton agjencia Tanjug, duke shtuar se komuniteti serb në Kosovë është vënë në pasiguri nëse ka fare të ardhme në vatrat e tij.

Gjuriqi falënderoi sekretarin e përgjithshëm të OKB-së, Antonio Guterres, përfaqësuesin special Peter Due dhe ekipin e UNMIK-ut, duke theksuar se misioni mbetet i nevojshëm sepse personeli i tij mund të dëgjojë njerëzit, përvojat e të cilëve në raportet ndërkombëtare shpesh reduktohen në disa rreshta të kujdesshëm. Ai u kërkoi anëtarëve të Këshillit të imagjinojnë mëngjesin e zakonshëm të një familjeje serbe në Kosovë: “Prindi e përgatit fëmijën për shkollë, një anëtari të moshuar i duhet ilaçi, dikush duhet të tërheqë pensionin. Asgjë nga kjo nuk duhet të kërkojë negociata diplomatike.”

Por, kur shkollat dhe institucionet shëndetësore rrezikohen, kur institucionet mbyllen dhe kur pagesat e pagave apo shërbimet sociale pengohen, jeta e përditshme bëhet mjet presioni politik, theksoi Gjuriqi. Sipas tij, raporti shënon mbyllje dhe ndërprerje të punës së institucioneve nga të cilat varen serbët, çështje të pazgjidhura për kthimin e gjyqtarëve, prokurorëve dhe personelit gjyqësor serb, rrënime të shtëpive dhe pronave të serbëve rreth liqenit të Gazivodës, si dhe pretendime serioze për keqtrajtim policor.

Gjuriqi kujtoi se pas shënimit të Vidovdanit në Gazimestan u arrestuan 37 persona, mes tyre edhe një i mitur, dhe se personeli i UNMIK-ut për të drejtat e njeriut vuri re mavijosje dhe lëndime të tjera te disa të ndaluar, të cilët raportuan keqtrajtim gjatë transportit dhe ndalimit. “Reintegrimi i gjyqtarëve, prokurorëve dhe personelit gjyqësor serb nuk është detaj teknik, por pjesë e rivendosjes së besimit, pa të cilin drejtësia nuk mund të funksionojë”, tha ai.

Në seancë foli edhe përfaqësuesi special i sekretarit të përgjithshëm dhe shefi i UNMIK-ut, Peter Due, i cili, sipas raportimit të Tanjug-ut, theksoi rëndësinë e përparimit në dialogun Beograd–Prishtinë dhe bëri thirrje për zbatimin e marrëveshjeve të arritura tashmë, përfshirë formimin e Asociacionit të komunave me shumicë serbe, duke kërkuar përkushtim të vërtetë nga të dyja palët.