Provimi juridik: studentët shqiptarë këmbëngulin për të gjithë provimin në shqip, Kambovski e quan racional propozimin e Shasivarit

Studentët shqiptarë të drejtësisë e refuzuan publikisht propozimin e ministrit të Drejtësisë, Jeton Shasivari, për mënyrën e dhënies së provimit juridik dhe këmbëngulën që i gjithë provimi të zhvillohet në gjuhën shqipe, në të kundërtën paralajmërojnë se do të protestojnë sërish. Siç njofton Tetova Expres, duke iu referuar raportimit të Sloboden Pečat, propozimi i ministrit parashikon që pjesa teorike e provimit, përkatësisht 12 lëndë, të jepen në gjuhën shqipe dhe dy në maqedonisht, me mbështetje gjuhësore dhe përkthim.

Kryeministri Hristijan Mickoski, ndërkaq, këmbëngul se pjesa me shkrim e provimit duhet të mbetet në gjuhën maqedonase, përkatësisht se gjuha e përbashkët e sistemit të drejtësisë është maqedonishtja, transmeton Tetova Expres.

Akademiku Vllado Kambovski deklaroi sot për Sloboden Pečat se propozimi i Shasivarit i duket racional, nëse kihet parasysh se fushat në fjalë janë ndër më të ndjeshmet në të drejtën, ku është jashtëzakonisht e rëndësishme të ekzistojë terminologji juridike e harmonizuar. Sipas tij, terminologjia juridike në vend nuk është përpunuar dhe zhvilluar mjaftueshëm në të gjitha gjuhët në të cilat kërkohet të jepet provimi.

Prandaj, Kambovski i propozoi ministrit të Drejtësisë dhe kolegëve të tjerë që të ndërmerret një nismë në të gjitha fakultetet juridike, pavarësisht nga gjuha në të cilën zhvillohet mësimi, për një fond të përbashkët të njësive programore dhe lëndëve të detyrueshme, me përmbajtje të harmonizuar të programeve dhe literaturë të detyrueshme të unifikuar. Siç thekson akademiku, gabimet në përdorimin e terminologjisë, veçanërisht në të drejtën penale, mund të jenë fatale.

Sipas Kambovskit, më e rëndësishmja është se me çfarë njohurish të zbatueshme do të hyjnë nesër studentët në sistemin e drejtësisë dhe si do t’i ushtrojnë profesionet juridike, ndërsa përdorimi i gjuhës duhet t’u nënshtrohet parimeve themelore të procedurës, pa e kufizuar të drejtën për ta dhënë provimin në gjuhën amtare.