Gjyqi ndaj Ahmetajt, shtyhet seanca paraprake

Këtë të hënë ishte parashikuar të zhvillohej në Gjykatën e Posaçme GJKKO, seanca paraprake lidhur me fraksionin e dosjes së inceneratorit të Elbasanit, për të cilën po hetohet ish-zv.kryeministri Arben Ahmetaj.

Gazetarja e Klan News Glidona Daci raporton se seanca ndaj Ahmetajt dhe të pandehurve të tjerë është shtyrë, pasi nuk ishin njoftuar disa prej të akuzuarve dhe seanca e radhës është caktuar të mbahet më 15 qershor.

Sjellim ndërmend se ish-ministri Ahmetaj është gjithashtu nën hetim për një tjetër çështje të lidhur me inceneratorët, ndërkohë që ndodhet në kërkim, i dyshuar për korrupsion dhe pastrim parash.

Çështja tjetër e njohur si “Buka”, për të cilin Ahmetaj po hetohet, ka të bëjë me privatizimin e kompanisë së bukës, ku asetet e shtetit dhe te privatëve janë rivlerësuar me çmimet e tregut, sikundër kërkohej nga vendimet e gjykatave në atë kohë.

SPAK thotë se hetimet e deritanishme kanë treguar se Ahmetaj shpërdoroi detyrën duke favorizuar për të privatizuar shoqërinë “Buka sha”.