Goditje e rëndë për Kosovën, Dellova humb dy ndeshjet e nëntorit

Kombëtarja e Kosovës ka pësuar një goditje të rëndë para dy ndeshjeve të nëntorit, siç njofton Telegrafi. Federata e Futbollit e Kosovës ka bërë të ditur se mbrojtësi Lumbardh Dellova është liruar nga grumbullimi, pasi ekzaminimet mjekësore treguan se ai nuk është në gjendje të luajë ndaj Izraelit dhe Irlandës.

Lajmi vjen si shqetësim i madh për trajnerin Franco Foda, i cili humb një tjetër mundësi në mbrojtje pikërisht para dy takimeve të rëndësishme. Dellova pritej të ishte pjesë e planeve të tij, por gjendja fizike nuk ia lejoi këtë herë të jetë i gatshëm për “Dardanët”.

Mbrojtësi 27-vjeçar kishte pasur probleme fizike edhe në tetor. Ai u dëmtua në ndeshjen e Amedsporit kundër Genclerbirligit në Superligën e Turqisë, ndërsa një rezonancë magnetike e konfirmoi dëmtimin. Klubi i tij nisi menjëherë trajtimin, ndërsa rikuperimi pritej të zgjaste rreth një muaj.

Edhe pse dëshira e tij për t’iu bashkuar Kosovës ishte e madhe, gjendja fizike nuk e lejoi. Federata e Futbollit e Kosovës i uroi atij shërim të shpejtë dhe rikthim sa më të shpejtë në fushë.

Dellova nuk është mungesa e vetme në këtë grumbullim. Për shkak të dëmtimeve me klubet e tyre, të padisponueshëm janë edhe Valmir Matoshi dhe Erblin Osmani. Ndërkohë, Albian Hajdari dhe Vesel Demaku nuk u ftuan, pasi vazhdojnë rikuperimin nga dëmtimet.