Grabitja në Rinas: 4 të ndaluar nga policia, 2 në Elbasan
Policia ka ndaluar 4 persona për sa i përket çështjes së grabitjes së Rinasit më 9 prill.
Pasditen e djeshme janë ushtruar kontrolle të imtësishme në qytetet e Tiranës, Elbasanit dhe Fushë-Krujës për zbardhjen e kësaj ngjarjeje edhe për gjetjen e personit të konsideruar përgjegjës pas Admir Muratajt cili mbeti i vrarë gjatë një shkëmbimi zjarri me forcat e policisë.
Nga personat e mësipërm, 2 janë ndaluar nga policia në Elbasan, si të lidhur me grabitjen në aeroportin e Rinasit. 2 të ndaluarit mendohet se kanë modifikuar furgonin e Rinasit, me mbishkrimin “Hetimi Tatimor”.
Ata dyshohet se kanë lidhje ne persona që akuzohen për disa krime të ndodhura në vendin tonë si edhe jashtë Shqipërisë. Ndalimi i dy shtetasve nga Elbasani pritet të hedhë dritë për identifikimin e personave që dyshohet se janë të përfshirë në grabitjen e Rinasit.
Njëri nga të dyshuarit u ndalua në lagjen ‘28 Nëntori’ , i dyshuari tjetër u ndalua në periferi të qytetit. Dy të ndaluarit mësohet të jenë të moshës 28 dhe 29 vjeç.
