Harduvelis: Reformat do të bëhen pasuri e popullit kur njerëzit të shohin para në xhepat e tyre

Takimit të para disa ditëve në Berlin me homologun gjerman Wolfgang Schauble, por edhe rezervave të shprehura nga kreditorët, iu është referuar ministri grek i Financave, Gjikas Harduvelis, i intervistuar nga radioja gjermane ”Deutsche Welle”.

Sipas radios ”marrëdhënia e Greqisë me kreditorët ndodhet në një fazë kritike. Programi i dytë i mbështetjes po përfundon, Trojka po përgatit vlerësimin përfundimtar dhe Greqia do të duhet të negociojë me partnerët se çfarë do të bëhet më tej”.

”Mundet që reformat të fillojnë, mirëpo që të kenë vazhdimësi duhet të bëhen pasuri e njerëzve. Çështja është si arrihet kjo”, vëren Harduvelis.

”Reformat do të bëhen pasuri e popullit, kur njerëzit të shohin para në xhepat e tyre dhe përfundimisht të kuptojnë se kjo përpjekje kishte një fund pozitiv”, thekson ai.

”Dua ta lidh këtë ecuri edhe me faktin se vendi po zhvillohet dhe papunësia po ulet. Dhe dalëngadalë populli do të dojë të ndërtojë shtetin e vet, të rregullojë institucionet. Do të dojë të shohë shërbimin e tatimeve që të funksionojë, drejtësinë që të funksionojë më shpejt, do të dojë të shohë transparencë. Të gjitha këto i donim, po kurrë nuk u përpoqëm t’i arrinim. Tani dalëngadalë po ia arrijmë”, shtoi ministri grek i Financave, Gjikas Harduvelis.