Haxhinasto: Në 2016-n synojmë rritjen e volumit të mallrave në porte

Ministri i Transportit dhe Infrastrukturës, Edmond Haxhinasto, ka drejtuar sot analizën vjetore të autoriteteve portuale të vendit.

4 portet kryesore të vendit, i Durrësit, Shëngjinit, Vlorës dhe Sarandës, kanë shënuar një rritje të konsiderueshme të të ardhurave, kjo falë edhe fluksit të madhe të pasagjerëve dhe turistëve gjatë vitit 2015.

Disa nga arritjet që portet kryesore shënuan gjatë vitit të kaluar, ishin përmirësimi i ndjeshëm i shërbimeve ndaj qytetarëve dhe biznesit. Ndërkohë që po kryen ndërhyrje në modernizimin e përmirësimin e terminaleve të pasagjerëve dhe thellimi baseneve, për të bërë të mundur ankorimin e anijeve me tonazh të rëndë.

Ministri Haxhinasto theksoi se pavarësisht rezultateve të mira, sfidë mbetet përmirësimi i mëtejshëm i shërbimeve dhe veçanërisht hartimi i strategjive të veçanta për rritjen e volumit të mallrave.

Ministri theksoi se brenda pak kohësh do të jenë gati edhe planet e reja të tarifimit, çfarë do të rrisë edhe mundësinë e konkurueshmërisë të porteve shqiptare në rajon. Ndaj, ministri Haxhinasto, iu drejtua krerëve të porteve duke iu thënë se “ka ardhur koha të ketë një qasje më komerciale për të rritur konkurueshmërinë në rajon”.