Hidrocentrali me konçesion. Hapet tenderi për projektin e Kalivaçit

Pas prishjes së kontratës me shoqërinë italiane “Hidro SRL”, qeveria ka rihapur tenderin për dhënien me konçesion të hidrocentralit të Kalivaçit.
Ministria e Energjisë ka publikuar në Agjencinë e Prokurimit thirrjen zyrtare për oferta për ndërtimin e hidrocentralit në lumin e Vjosës. Sipas dokumentave, afati përfundimtar i dorëzimit të ofertave është data 18 korrik.
Fituesi do të përzgjidhet sipas 6 kritereve, që janë vlera e tarifës konçesionare, ndikimi mjedisor, fuqia e instaluar, afati i ndërtimit, skema e lidhjes së hidrocentralit në rrjet dhe vlerësimi për vlerën ekzistuese të punimeve.
Por për të marrë pjesë në tender kompanitë duhet të plotësojnë disa kushte. Së pari, xhiroja që ato kanë realizuar dy vitet e fundit, pra 2015 dhe 2016, të jetë e barabartë me vlerën e investimit, ndërsa fitimi i vitit të kaluar të jetë të paktën sa 7 për qind e investimit.
Hidrocentrali do të jepet me konçesion për 35 vjet. Pas kësaj periudhe, kompania ndërtuese do ta transferojë atë në pronësi të shtetit. Ai i Kalivaçit është konçesioni i parë energjetik i shpallur nga shteti shqiptar.
Saga e hidrocentralit me fuqi të instaluar rreth 100 mega ka nisur që në vitin 1997, plot 20 vjet më parë, kur qeveria e atëhershme ia dha konçesionin një kompanie italiane.
Por vepra nuk u ndërtua. Shoqëria ndërtuese u përfshi në konflikte gjyqësore me qeverinë, por edhe kompanitë nënkontraktore për vite me radhe.
Pak muaj më parë, qeveria e prishi kontratën me kompaninë hidro srl. Sipas Ministrisë së Energjisë, konçesioni u anulua pasi kompania italiane shkeli kontratën.