Histori përmes pullave, në ekspozitë në Durrës

Në Ditën Ndërkombëtare të Muzeve është çelur në Durrës ekspozita “Peeping Tourists”.

E veçanta ishte ekspozimi i pullave shqiptare, duke zbuluar historinë e Shqipërisë, nëpërmjet filatelisë.

Kjo është hera e parë që në Durrës ofrohet një mundësi për turistët vendas dhe të huaj, që zgjedhin Durrësin për të vizituar.

Çdo pullë zbulon një histori thotë nëndrejtori i Postës Shqiptare, Ardit Demiri.

Ekspozita e vendosur në ambientet e muzeut “Turistë të përgjuar” ka tërhequr vëmendjen e turistëve që në hapjen e saj, të cilët tregojnë që kanë zgjedhur këtë muze dhe Durrësin për lidhjen e ngushtë me historinë.

“Sapo kemi ardhur në Durrës. Pamë këtë muze online dhe na tërhoqi shumë. Mua më intereson historia e Durrësit. Periudha juaj e komunizmit është mjaft interesante për ne si turistë që vijmë nga Anglia. Nga ana tjetër, edhe në Angli ka shumë broshura dhe informacione për Shqipërinë, ndaj vendosëm të vinim këtu”, tha një turiste nga Anglia.

“Jemi shumë të interesuar për periudhën komuniste dhe një gjë që më bëri shumë përshtypje ishte fakti që, deri në vitin 1991, nuk lejoheshin turistë nga vende si Afrika e Jugut. U çudita, sepse e kuptoj ndalimin për vende si Amerika, Izraeli apo Mbretëria e Bashkuar, por ç’lidhje kishte Afrika e Jugut? Diktatori Enver Hoxha kishte krijuar një sistem të tillë, ku nuk lejohej hyrja në Shqipëri për shtetas nga vende që regjimi i konsideronte të padëshiruara”, tha një turist nga Anglia.

Muzeu “Turistë të përgjuar” ka nisur rrugëtimin e tij pesë vite më parë, duke u bërë një ndalesë e rëndësishme, për turistët e shumtë, që kanë interes të njohin historinë tonë, veçanërisht të periudhës së komunizmit.

Klan News

/tvklan.al