Humbje historike e Serbisë: Sllovenia e mposht 3–0 dhe e lë jashtë çerekfinales së Evropianit

Kombëtarja e Serbisë në volejboll ka pësuar një nga humbjet më të rënda në historinë e saj. Sllovenia e mposhti sonte me rezultatin bindës 3–0 në sete (25:14, 25:13, 25:22) në ndeshjen e së tetës së finales së Kampionatit Evropian të volejbollit për meshkuj.

Sllovenët dominuan takimin nga fillimi në fund. Dy setet e para i fituan me lehtësi të madhe, kurse në setin e tretë Serbia u përpoq të rikthehej, por Sllovenia e mbylli ndeshjen me 25:22.

Me këtë eliminim, Serbia mbetet jashtë çerekfinales së Kampionatit Evropian për herë të parë në historinë e saj — një moment historik negativ për volejbollin serb, i cili nuk kishte munguar asnjëherë më parë në mesin e tetë skuadrave më të mira të Evropës.

Ndërkohë, Sllovenia vazhdon rrugëtimin në Evropian. Në çerekfinale, sllovenët do të përballen me Belgjikën, e cila siguroi kualifikimin pas fitores 3–1 ndaj Çekisë.

Burimi: Danas