Huthi-t mohojnë se lëshuan dronë drejt Medinës: S’kemi kryer asnjë operacion ushtarak ndaj Arabisë Saudite

Huthi-t e Jemenit thanë të mërkurën se nuk kanë lëshuar asnjë dron drejt qytetit të shenjtë saudit të Medinës dhe nuk kanë kryer asnjë operacion ushtarak ndaj Arabisë Saudite, duke hedhur poshtë deklaratat e mëparshme të koalicionit të udhëhequr nga Arabia Saudite në Jemen, siç njofton Reuters.

Deklarata u bë nga zëdhënësi ushtarak i grupit të lidhur me Iranin, Yahya Saree, dhe erdhi pasi koalicioni tha se kishte interceptuar dronë mbi Medinën dhe Provincën Lindore, në pjesën lindore të mbretërisë ku ndodhen fushat kryesore të naftës.

Luftimet mes koalicionit që mbështet qeverinë e njohur ndërkombëtarisht të Jemenit dhe milicisë Huthi, e cila kontrollon kryeqytetin Sanaa, janë përshkallëzuar javët e fundit, duke u bërë një front tjetër i luftës SHBA–Izrael kundër Iranit.

Huthi-t kanë sulmuar më herët aeroportin ndërkombëtar të Riadit dhe gjigantin shtetëror të naftës Saudi Aramco, duke ndërprerë fluturimet dhe eksportet e naftës. Të martën, një sulm me raketa i Huthi-ve ndaj një kampi stërvitor të forcave qeveritare të sigurisë në provincën Shabwa vrau 73 vetë.

Përshkallëzimi i fundit është dhuna më serioze mes Arabisë Saudite dhe Huthi-ve që nga armëpushimi i ndërmjetësuar nga OKB-ja në vitin 2022, i cili i kishte ndalur kryesisht sulmet ndërkufitare.