Hyjnë në fuqi në datën 12 nëntor penalitetet për bizneset të cilat kryejnë evazion fiskal

Administrata fiskale tashmë “ka në dorë” masat e reja të penaliteteve për bizneset që kryejnë evasion fiskal nisin aplikimin që nga dita e enjte. Ndryshimet e reja të procedurave tatimore partashikojnë që bizneset kanë kohë për “reflektim” për vetëdeklarimin dhe korrigjimin e bilanceve deri në fund të këtij viti.

Penalitetet e reja me gjobë për bizneset variojnë nga 500 mijë lekë në 10 milion lekë si dhe kallëzim penal. Referuar këtyre ndryshimeve, me gjobë në masën 500 mijë lekë penalizohen bizneset që nuk deklarojnë adresën, nuk afishojnë listën e çmimeve të mallrave apo shërbimeve, nuk deklarojnë punonjësit, nuk deklarojnë pagën reale të punonjësve apo nuk lëshon kupon tatimor. Penaliteti me gjobë në vlerë 10 milion lekë do të aplikohet për rastet kur bizneset e mallrave me shumicë nuk lëshojnë faturë tatimore, dëftesë tatimore apo faturë tatimore me TVSH.

Po ashtu, e njëjta masë ndëshkimi aplikohet kur lëshohet kupon tatimor, dëftesë tatimore apo biletë me vlerë të parashtypur, që nuk përmban elementet e përcaktuara në këtë ligj. Me gjobë 10 milion lekë penalizohet edhe tatimpaguesit e mallrave me shumicë që mbajnë në ruajtje, përdorin apo transportojnë mallra të pashoqëruara me dokumente tatimore, raporton Scan.

Përveç gjobës së lartë, penaliteti parashikon edhe konfiskimin e të gjithë sasisë së mallit dhe rivlerësimin tatimor të të ardhurave për një periudhë 6 mujore. Ndryshimet e miratuara në procedurat tatimore parashikojnë edhe penalitete të tjera si mbledhjen me forcë përmes konfiskimit të detyrimeve të tatim­fitimit në rastet kur ka vonesa apo edhe faljen për bizneset që vetëdeklarojnë mangësitë e pasqyrave financiare.

1­ Gjobë në masën 500 mijë lekë bizneset që nuk deklarojnë adresën

2­ Gjobë në masën 500 mijë lekë bizneset që nuk afishojnë listën e çmimeve të mallrave apo shërbimeve

3­ Gjobë në masën 500 mijë lekë bizneset që nuk deklarojnë pagën reale të punonjësve apo nuk lëshon kupon tatimor.

4­ Gjobë në vlerë 10 milion lekë kur bizneset e mallrave me shumicë nuk lëshojnë faturë tatimore, dëftesë tatimore apo faturë tatimore me TVSH.

5­ Gjobë në vlerë 10 milion lekë kur bizneset kur lëshohet kupon tatimor, dëftesë tatimore apo biletë me vlerë të parashtypur, që nuk përmban elementet e përcaktuara në këtë ligj.

6­ Gjobë 10 milion lekë penalizohet edhe tatimpaguesit e mallrave me shumicë që mbajnë në ruajtje, përdorin apo transportojnë mallra të pashoqëruara me dokumente tatimore.