Igor Simiq: Unë dhe disa anëtarë të Listës Serbe jemi thirrur nga Prokuroria Speciale e Kosovës

Nënkryetari i Listës Serbe, Igor Simiq, ka deklaruar më 29 shtator se ai dhe disa anëtarë të tjerë të partisë kanë marrë ftesa nga Prokuroria Speciale e Republikës së Kosovës, siç njofton KosovaPress.

Sipas tij, ftesat lidhen me dyshime për katër vepra penale: bashkim për veprimtari kundërkushtetuese me qëllim sulmin ndaj rendit kushtetues, rrezikim të personave nën mbrojtje ndërkombëtare, sulm ndaj personit zyrtar, dhe pjesëmarrje në turmë që kryen vepër penale dhe huliganizëm.

Në një videoparaqitje lidhur me këtë çështje, Simiq i cilësoi ftesat si presion ndaj përfaqësuesve të Listës Serbe, duke pretenduar se ato vijnë sa herë që flet në Kuvend për gjendjen e serbëve në Kosovë.

“Si gjithmonë, do t’i përgjigjem ftesës, sepse nuk kam çfarë të fsheh. Nuk kam kryer asnjë vepër penale”, citohet të ketë thënë ai, sipas raportimit të KosovaPress-it.

Në materialin e publikuar prej tij nuk jepen hollësi se me cilat ngjarje konkrete lidhen dyshimet, dhe pretendimet e Simiqit për motivet e ftesave nuk janë konfirmuar ende nga Prokuroria Speciale — media njoftoi se do ta publikojë qëndrimin e prokurorisë sapo ajo të përgjigjet.