Incident i ri mbi Baltik vetëm brenda pak ditësh, avionët polakë kapin një avion zbulimi rus Il-20

Avionët luftarakë polakë interceptuan një aeroplan zbulues rus Il-20 mbi Detin Baltik, rreth 40 kilometra larg bregdetit, incidenti i dytë i tillë këtë javë, si pjesë e asaj që ekspertët e quajnë përpjekjet e Moskës për të testuar përgjigjen e NATO-s, raporton sot Tvp world.

Ministri polak i Mbrojtjes, Władysław Kosiniak-Kamis, tha se avioni u kap në veri të Ustkës, një qytet bregdetar në Poloninë veriore.

Ai tha se avioni po fluturonte me sistemet e identifikimit të fikura, gjë që “paraqiste një kërcënim për aviacionin civil”.

Sipas raportimeve, avioni nuk hyri në hapësirën ajrore polake.

Incidenti ndodhi vetëm disa ditë pasi avionët luftarakë polakë interceptuan një tjetër Il-20 rus të hënën, rreth 30 kilometra në veri të Lebës, një qytet tjetër në bregdetin baltik të Polonisë.

Dhe ai aeroplan mbeti jashtë hapësirës ajrore polake.

Pas incidentit të së hënës, Kosiniak-Kamish i përshkroi fluturime të tilla ruse si përpjekje për të testuar “sistemet e pengimit dhe mbrojtjes ajrore” të Polonisë.

Takime të tilla janë bërë më të shpeshta që kur Moska nisi një pushtim në shkallë të plotë të Ukrainës në vitin 2022, me avionë ushtarakë rusë që shpesh fluturojnë afër hapësirës ajrore të NATO-s pa paraqitur plane fluturimi ose pa ndezur transponderët e tyre.

Këto fluturime i shtyjnë rregullisht avionët luftarakë polakë dhe aleatë të bëjnë ngritje emergjente për të identifikuar dhe ndjekur avionët rusë.

Aviacioni ushtarak rus në rajon monitorohet gjithashtu përmes misionit të NATO-s për të mbrojtur hapësirën ajrore të vendeve baltike, në të cilin aeroplanët aleatë patrullojnë hapësirën ajrore mbi shtetet baltike, kujton kanali polak.

Polonia është në gatishmëri të lartë për shkelje të mundshme të hapësirës ajrore pasi një raketë ruse H-101 hyri në vend gjatë një sulmi në shkallë të gjerë ndaj Ukrainës në fund të korrikut.

Predha, për të cilën zyrtarët polakë thanë se mbante një “sasi të konsiderueshme” eksplozivi, ra pranë qytetit Tarnawa-Kolonia në Poloninë lindore, rreth 80 kilometra nga kufiri ukrainas, duke krijuar një krater disa metra të gjerë.

Ky rast i fundit i përgjimit vjen në një kohë tensionesh të larta në krahun lindor të NATO-s dhe shqetësimesh në rritje në Poloni dhe pjesë të tjera të Evropës mbi aktivitetet ushtarake ruse dhe dyshimet për operacione hibride.

Varshava thirri sot ambasadorin rus Georgy Mikhn për të shprehur “dënimin e fortë të terrorizmit shtetëror rus” pas një serie incidentesh që i atribuohen Moskës dhe dyshohen për akte sabotimi.

Ky veprim erdhi pasi Polonia shprehu solidaritet me Gjermaninë lidhur me një tentativë sulmi me dron ndaj një aeroplani mallrash ukrainas në aeroportin Leipzig-Halle në fillim të gushtit. Autoritetet gjermane fajësuan Rusinë për incidentin të martën.