INSTAT: Tetori, rritje për duhanin dhe arsimin
Indeksi i çmimeve të konsumit (IÇK) në muajin tetor arriti 1,4%, ndërsa një vit më parë ishte 1,7%, raportoi dje Instituti i Statistikave.
IÇK në muajin tetor, në ndryshimin vjetor u ndikua kryesisht nga grupet “Ushqime dhe pije joalkoolike” me +0,63 pikë përqindje, “Pije alkoolike dhe duhan” me +0,27 pikë përqindje, “Mallra dhe shërbime të ndryshme” me +0,18 pikë përqindje, “Qira, ujë, lëndë djegëse dhe energji” me +0,16 pikë përqindje dhe “Shëndeti” me – 0,20 pikë përqindje. Krahasuar me muajin tetor 2013, rritja më e madhe e çmimeve vërehet në grupet “Shërbimi arsimor” me 11,2%, “Pije alkoolike dhe duhan” me 7,4%, ku kryesisht çmimi i duhanit u rrit 12,4%. Çmimet e grupit “Mallra dhe shërbime të ndryshme” u rrit me 3,8% dhe “Komunikimi” 2,7%. Me rritje rezultojnë edhe çmimet e grupit “Hotele, kafene e restorante me 1,9%. Në grupin “Ushqime dhe pije joalkoolike” çmimet u rritën me 1,6%. Ndikimin kryesor e dhanë frutat, perimet, bulmeti. Kështu, brenda grupit, çmimet e nëngrupit “fruta” u rritën me 9,2%, nëngrupi “zarzavate përfshirë patatet” me 7,3%, “qumësht, djathë e vezë” me 2,1% etj. Çmimet e nëngrupit “vajra dhe yndyra” u ulën me 7,5%, “sheqer e ëmbëlsira” me 2,7%, “kafe, çaj e kakao” me 3,4% etj. Ulja më e madhe e çmimeve u vu re në grupin “Shëndeti” me 5,7%.
