Irani do t’i përgjigjet SHBA-së për propozimin e Hormuzit sapo të mbyllet shqyrtimi: përgjigjja do të vijë përmes ndërmjetësve

Irani është ende duke shqyrtuar përgjigjen e Shteteve të Bashkuara ndaj propozimit të tij për rihapjen e Ngushticës së Hormuzit dhe do t’i përgjigjet Uashingtonit përmes ndërmjetësve sapo të mbyllet ky shqyrtim, siç njofton Reuters. Deklarata u bë të hënën nga zëdhënësi i Ministrisë së Jashtme iraniane, Esmaeil Baghaei, në konferencën e tij për shtyp në Teheran.

Baghaei tha gjithashtu se Irani vazhdon të shkëmbejë mesazhe me SHBA-të përmes ndërmjetësve, pa dhënë detaje të mëtejshme. Ndër vendet që kanë vepruar si ndërmjetës në përpjekjet për t’i dhënë fund luftës, e cila nisi me sulmet amerikane dhe izraelite ndaj Iranit më 28 shkurt, janë Katari dhe Pakistani.

Procesi ka ngecur pasi shefi iranian i sigurisë tha të dielën se përgjigja e Uashingtonit nuk i adresonte mjaftueshëm shtatë kushtet e Teheranit për rihapjen e ngushticës dhe rikthimin në bisedime. Sipas Reuters, pika qendrore e mosmarrëveshjes mbetet këmbëngulja e Uashingtonit që programi bërthamor i Iranit të adresohet që në fillim, ndërsa Teherani thotë se bisedimet duhet të përqendrohen fillimisht te rihapja e Hormuzit dhe rikthimi i sigurisë në rrugën detare, e cila para luftës mbante rreth një të pestën e tregtisë globale të naftës dhe gazit të lëngshëm natyror (LNG).

I pyetur për përshkallëzimin e konfliktit mes Arabisë Saudite dhe Huthi-t të Jemenit, aleatë të Iranit, Baghaei përsëriti hapjen e Teheranit për të ndihmuar në zgjidhjen e krizës përmes dialogut. «Çështja e Jemenit duhet të ishte zgjidhur shumë kohë më parë me hartën e rrugës së OKB-së… Kërkesa jonë është që kjo situatë të zgjidhet përmes dialogut», tha ai.