IRGC e quan tërheqjen e SHBA-së nga Iraku “fitore historike”: “Uashingtoni duhet të largohet nga i gjithë rajoni”

Garda Revolucionare e Iranit (IRGC) e ka përshëndetur tërheqjen e forcave amerikane nga Iraku si një “fitore historike” për forcat e rezistencës së vendit, duke kërkuar njëkohësisht që Uashingtoni të tërheqë praninë e tij ushtarake nga e gjithë Lindja e Mesme, raporton Al Jazeera duke cituar agjencinë iraniane të lajmeve ISNA.

Sipas deklaratës së Gardës, prania e gjerë ushtarake e Shteteve të Bashkuara në rajon është shkaku rrënjësor i paqëndrueshmërisë. “SHBA-ja duhet të largohet nga rajoni dhe t’ua lërë menaxhimin e sigurisë vetë kombeve,” thuhet në deklaratë, duke shtuar se tërheqja nga Iraku është “një hap i rëndësishëm në rrugën e çlirimit nga varësia ndaj të huajve”.

IRGC gjithashtu theksoi kostot njerëzore dhe financiare të fushatës ushtarake dhe pushtimit amerikan në Irak. “Pas njëzet vjetësh ndërhyrjeje ushtarake, me rreth pesë mijë të vdekur, sipas shifrave të tyre, dhe mijëra të plagosur e të paaftë, si dhe shpenzimin e miliarda dollarëve, nuk ka arritur asnjë rezultat domethënës,” thuhet në deklaratë.

Deklarata vjen një ditë pasi Iraku festoi “Ditën e Sovranitetit” më 1 tetor, duke shënuar tërheqjen e trupave amerikane dhe të forcave ndërkombëtare pas më shumë se një dekade misioni kundër ISIS-it. Kryeministri irakian Ali al-Zaidi e ka përshëndetur tërheqjen si “realizimin e sovranitetit të plotë dhe gjithëpërfshirës të Irakut”, ndërsa Teherani e sheh largimin e amerikanëve si konfirmim të kërkesës së tij të kahershme për t’i dhënë fund pranisë ushtarake të huaj në rajon.