ISIS i deklaron luftë Twitter-it, kërcënon themeluesin dhe punonjësit

Pas Facebook edhe Twitter është bërë pjesë e kërcënimeve të ISIS. Fajtori kryesor për fshirjen e shumë profileve të xhihadistëve në këtë rrjet social, themeluesi Jack Dorsey dhe punëtorë të tjerë të Twitter janë kërcënuar me jetë nga luftëtarët e Shtetit Islamik.

“Lufta juaj virtuale kundër nesh do të provokojë një luftë reale kundër jush”,- ka qenë teksti i mesazhit të publikuar në një nga sajtet anonime me qendër në Poloni, i përdorur nga programuesit për të mbledhur dhe shpërndarë fragmente të kodeve informatike, i cili është raportuar më pas nga sajti amerikan Buzzfeed. Mesazhi është i shoqëruar nga një fotografi me fytyrën e Dorsey, i cili është vendosur në qendrën e një shënjestre.

“Ti e ke nisur këtë luftë të humbur. Ta kemi thënë që në fillim se nuk është lufta jote, por nuk deshe ta kuptosh dhe vijove me mbylljen e llogarive tona në Twitter, por ne kthehemi gjithmonë. Kur luanët tanë të vijnë për të të marrë frymën, ti nuk do të kthehesh më”,- shkruhet në mesazh.

Më tej mesazhi kërcënues vijon edhe për punonjësit: “Hey Jack, si do ti mbrosh nënpunësit e tu kur qafat e tyre të shndërrohen në objektivin kryesor për ushtarët e kalifatit… çfarë do tu thuash familjeve të tyre?”.

Twitter ka deklaruar në Cnbc se ka denoncuar rastin dhe se ka nisur një hetim mbi ngjarjen.