Itali, rritja e një fëmije deri në 18 vjeç kushton deri në 212 mijë euro

Rritja e një fëmije në Itali po bëhet gjithnjë e më e kushtueshme, me shpenzimet nga lindja deri në moshën 18 vjeç që mund të arrijnë deri në 212 mijë euro.

Sipas të dhënave të publikuara së fundmi, kostoja mesatare për një fëmijë gjatë 18 viteve llogaritet rreth 162 mijë euro, ndërsa në varësi të nivelit të shpenzimeve familjare mund të variojë nga rreth 112 mijë deri në 212 mijë euro.

Shpenzimet nisin që para lindjes, me vizitat mjekësore, ekografitë, kurset përgatitore dhe pajisjet për të porsalindurin, ndërsa me rritjen e fëmijës shtohen kostot për ushqimin, arsimin, veshjet, aktivitetet sportive, teknologjinë dhe argëtimin.

Periudha e adoleshencës rezulton ndër më të kushtueshmet. Për moshën 15 deri në 18 vjeç, shpenzimet mund të arrijnë rreth 50 mijë euro, të ndikuara veçanërisht nga arsimi, teknologjia, aktivitetet jashtëshkollore dhe rritja e nevojave personale.

Të dhënat tregojnë gjithashtu një rritje të shpenzimeve për shërbimet me abonim, arsimin dhe pajisjet teknologjike.

Kostoja e një fëmije përbën një peshë të konsiderueshme për buxhetin familjar, veçanërisht për familjet me një prind, ndërsa ardhja e një fëmije të dytë sjell një tjetër rritje të ndjeshme të shpenzimeve.

Rritja e kostos së jetesës dhe e shpenzimeve për fëmijët është një nga faktorët që lidhet me debatin e gjerë në Itali për rënien e lindjeve dhe sfidat ekonomike të familjeve.